ەكس-مادەنيەت ءمينيسترى ارىستانبەك مۇحامەديۇلىنىڭ ءىسى بويىنشا سوتتالعان ايىم سادۋاقاسوۆانىڭ ۇلى نۇربەك سادۋاقاسوۆ پرەزيدەنت قاسىم-جومارت توقاەۆتىڭ اتىنا ءوتىنىش جولدادى. بۇل تۋرالى سادۋاقاسوۆ الەۋمەتتىك جەلىدەگى پارپقشاسىنا جاريالانعان، دەپ حابارلايدى “ادىرنا” ۇلتتىق پورتالى.
ول ءوز سوزىندە پرەزيدەنتتىڭ اتىنا ورىندالماس تىلەك ايتىپ تۇرماعانىن، ءوزىنىڭ تەك ادىلدىكتى سۇرايتىنىن ايتادى.
قازاقستان رەسپۋبليكاسىنىڭ پرەزيدەنتى قاسىم-جومارت كەمەلۇلى، ءسىز ەلىمىزدەگى كونستيتۋتسيا مەن ادىلەتتىڭ كەپىلىسىز. مەن، ارينە، جاڭا ۇرپاق رەتىندە، جاڭا قازاقستاندى قولدايمىن، بىراق مەنىڭ بارلىق ءۇمىتىم 2023 جىلدىڭ 20 ماۋسىمىندا ءسوندى. استانا قالاسىنىڭ قىلمىستىق ىستەر جونىندەگى اۋدانارالىق سوتى، دالىرەك ايتساق، ارىستانبەك مۇحامەديۇلىنىڭ 150 ميلليون تەڭگە جىمقىردى دەگەن ءىسى بويىنشا مەنىڭ اناما قاتىستى قاتاڭ ءارى ادىلەتسىز ۇكىم شىعاردى. مەن تەك ادىلدىكتى سۇرايمىن، – دەلدى سادۋاقاسوۆ.
ونىڭ ايتۋىنشا، بۇل ءىس قولدان ادەيى جاسالعان. سوت بارىسىندا ايىپتاۋ جانە كۋاگەرلەر تاراپىنان ەشقانداي ايعاق بولعان جوق، دەيدى ول.
ەسكە، Exponat جشس باس ەسەپشىسى ايىم سادۋاقاسوۆا جەتى جىلعا باس بوستاندىعىنان ايىرىلعان ەدى. ىس بويىنشا مۇحامەديۇلىنان بولەك ايىپتالۋشى رەتىندە ونىڭ ورىنباسارى الماز نۇراسحان، Exponat جشس ديرەكتورى ازامات كوشەنوۆ پەن باس ەسەپشى ايىم سادۋاقاسوۆا دا بار.ۇشەۋى دە مەملەكەتتىك قىزمەتتە جۇمىس ىستەۋگە تىيىم سالىنىپ، جەتى جىلعا باس بوستاندىعىنان ايىرىلعان.
ايتا كەتەيىك، 21 ماۋسىم ارىستانبەك مۇحامەديۇلى 8 جىلعا باس بوستاندىعىنان ايىرىلدى.
