بيىلعى وقۋ جىلىنا ارنالعان ءبىلىم گرانتتارىنىڭ ءتىزىمى جاريالاندى

ەلىمىزدە جوعارى ءبىلىم بەرۋدىڭ بارلىق دەڭگەيلەرى بويىنشا 2023 - 2024 وقۋ جىلىنا ارنالعان ءبىلىم بەرۋ گرانتتارىن ءبولۋ ءتىزىمى جاريالاندى، دەپ حابارلايدى "ادىرنا" ۇلتتىق پورتالى.

عىلىم جانە جوعارى ءبىلىم مينيسترلىگى دەرەگىنە سۇيەنسەك، بيىل جوعارى وقۋ ورىندارىندا وقۋ ءۇشىن 88 مىڭ گرانت بولىنگەن. گرانتتاردىڭ باسىم بولىگى "ينجەنەرلىك، وڭدەۋ، قۇرىلىس سالالارى" ءبىلىم بەرۋ باعدارلاما توپتارىنا ءبولىندى، ولاردىڭ سانى 18 744 گرانتتى قۇرايدى. ال "پەداگوگيكالىق عىلىمدارعا" – 12 560 گرانت، "اقپاراتتىق-كوممۋنيكاتسيالىق تەحنولوگيالار" سالاسىنا – 10 103 گرانت، "جاراتىلىستانۋ عىلىمدارى، ماتەماتيكا جانە ستاتيستيكا" باعىتىنا – 7 388 گرانت تيەسىلى. سونداي-اق، "سەرپىن" باعدارلاماسى ارقىلى تۇسۋشىلەرگە 3 653 گرانت بولىنگەن. "سەرپىن" جوباسى ارقىلى 4 دايارلاۋ باعىتى بويىنشا ءبىلىم الۋعا بولادى. اتاپ ايتساق، پەداگوگيكالىق عىلىمدار، ينجەنەرلىك-تەحنيكالىق، اقپاراتتىق تەحنولوگيالار، اۋىلشارۋاشىلىعى ماماندىقتارى بويىنشا وقۋعا تۇسە الادى. باعدارلاماعا وڭتۇستىك وڭىردەگى اۋىل جاستارى قاتىسادى. ايتا كەتسەك، وقۋ بىتىرگەسىن گرانت وتەۋ مەرزىمى 3 جىلدان 2 جىلعا قىسقارتىلدى. سونداي-اق، بۇرىن ماماندار ءوزى وقىعان ايماقتا عانا گرانتتى جۇمىسپەن وتەيتىن بولسا، ەندى 11 ايماقتا قىزمەت ەتە الادى. جالپى، باكالاۆرياتقا ءتۇسۋ ءۇشىن 2023-2024 وقۋ جىلىندا 73 مىڭعا جۋىق گرانت ءبولىندى. "مەملەكەت باسشىسىنىڭ تاپسىرماسى بويىنشا بارلىق گرانتتىڭ 60% تەحنيكالىق ماماندىقتارعا ءبولىندى. سونىمەن قاتار بيىل حالىق تىعىز قونىستانعان باتىس جانە جاڭادان قۇرىلعان وڭىرلەردىڭ جاستارى ءۇشىن گرانتتار ءبولىندى. تالاپكەرلەر بەرىلگەن اقپارات نەگىزىندە دۇرىس تاڭداۋ جاسايدى دەپ سەنەمىن", - دەپ اتاپ ءوتتى قر عىلىم جانە جوعارى ءبىلىم ۆيتسە-ءمينيسترى قۋانىش ەرعاليەۆ. ماگيستراتۋراعا تۇسۋگە 13 مىڭنان استام، دوكتورانتۋراعا تۇسۋگە 1800-دەن استام گرانت بولىنگەن.