الماتىنىڭ تۇركسىب اۋدانىندا ۆلاديمير لەنيننىڭ ەسكەرتكىشى الىنىپ تاستالدى، دەپ حابارلايدى «ادىرنا» ءتىلشىسى Ulysmedia.kz-كە سىلتەمە جاساپ.
ەسكەرتكىش سەيفۋللين داڭعىلى مەن شولوحوۆ كوشەسىنىڭ قيىلىسىنداعى ساياباقتا تۇرعان. تامىز ايىنىڭ ورتاسىندا اۋماق قورشالىپ، تۇرعىندارعا بولاشاق بالالار ويىن الاڭىنىڭ جوباسى ۇسىنىلعان. كەيىن مونۋمەنت ورنىنان جوعالىپ كەتكەن. قازىر بۇل جەردە قۇرىلىس تەحنيكاسى جۇمىس ىستەپ جاتىر.
ەسكەرتكىشتىڭ الىنۋى الەۋمەتتىك جەلىلەردە قىزۋ پىكىرتالاس تۋدىردى. بىرقاتار تۇرعىندار كەڭەستىك كەزەڭنىڭ سيمۆولىن الىپ تاستاۋدى قولداسا، ەندى بىرەۋلەرى قۇرىلىس جۇمىستارىنىڭ جۇرگىزىلۋىنە قاتىستى سىن ايتتى.
الماتى قالاسى اكىمدىگىنىڭ مالىمەتىنشە، مونۋمەنت جوندەۋ جانە اباتتاندىرۋ جۇمىستارى كەزەڭىندە ۋاقىتشا الىنعان. جۇمىستار اياقتالعاننان كەيىن ەسكەرتكىش بۇرىنعى ورنىنا قايتا ورناتىلادى.
ايتا كەتەيىك، لەنين ەسكەرتكىشى قازاقستان تاۋەلسىزدىك العاننان كەيىن دە تۇركسىب اۋدانىنداعى ساياباقتا ساقتالىپ كەلگەن. ال بۇعان دەيىن ول الماتىنىڭ ورتالىق بولىگىندە ورنالاسقان بولاتىن. 1990-جىلدارى مونۋمەنت قازىرگى ورنىنا كوشىرىلگەن.
سۋرەت: «ۆەستي الماتى»
