قازاقستان پرەزيدەنتى قاسىم-جومارت توقاەۆ يوردانيا كورولى ابداللا II بەن ءال-حۋسەيندى Al-Farabi وردەنىمەن ماراپاتتادى، دەپ حابارلايدى “ادىرنا”.
مونارح بۇل مەملەكەتتىك ناگرادانىڭ العاشقى يەگەرى اتاندى. ماراپاتتاۋ ءراسىمى يوردانيا كورولىنىڭ قازاقستانعا رەسمي ساپارى اياسىندا استانادا ءوتتى.
اقوردانىڭ مالىمەتىنشە، مەملەكەت باسشىسى ابداللا II-ءنىڭ قازاقستان مەن يوردانيا اراسىنداعى قارىم-قاتىناستى نىعايتۋعا قوسقان ۇلەسىن اتاپ ءوتتى.
پرەزيدەنتتىڭ ايتۋىنشا، وردەننىڭ تۇڭعىش يەگەرى رەتىندە يوردانيا كورولىنىڭ تاڭدالۋى – تاريحي ءارى سيمۆولدىق ءمانى بار وقيعا.
Al-Farabi وردەنى ەسىمى عىلىم، ادەبيەت جانە ساياسي وي تاريحىندا ايرىقشا ورىن الاتىن ۇلى ويشىل ءابۋ ناسىر ءال-ءفارابيدىڭ قۇرمەتىنە اتالعان. قاسىم-جومارت توقاەۆ ونىڭ دانالىق، ۇيلەسىم مەن بىرلىك تۋرالى يدەيالارى قازاقستان مەن اراب ەلدەرىنىڭ مادەني بايلانىسىن جاقىنداستىراتىنىن جەتكىزدى.
ءوز كەزەگىندە ابداللا II بەن ءال-حۋسەين قاسىم-جومارت توقاەۆقا يوردانيانىڭ ەڭ جوعارى مەملەكەتتىك ناگراداسى – ءال-حۋسەين يبن ءالي وردەنىن تابىستادى.
ايتا كەتەيىك، ءال-حۋسەين يبن ءالي وردەنى 1949 جىلى يوردانيا كورولى ابداللا I تاراپىنان قۇرىلعان. ول مەككە شەريفى حۋسەين بەن ءاليدىڭ قۇرمەتىنە اتالعان جانە يوردانيانىڭ جوعارى مەملەكەتتىك ناگراداسى سانالادى.
ال Al-Farabi وردەنىن مەملەكەت باسشىسى عىلىم مەن مادەنيەت قايراتكەرلەرى ءۇشىن 29 ساۋىردە تاعايىنداعان.
