الماتى قالاسىندا ورنالاسقان زاۆود بارىندا قازاق تىلىندە جازىلعان ءمازىر جوق جانە لوگوتيپتەرىندە كەڭەس وداعىنىڭ (كسرو) بەلگىسى بەينەلەنگەن. بۇل تۋرالى “ادىرنا” ۇلتتىق پارتالىنا وقىرمان حات جولداپ، ايتىپ بەردى.
وقىرماننىڭ ايتۋىنشا، بارعا بارعاندا قازاق ءتىلدى ءمازىردى مۇلدە كورمەگەن. سۇراعانىندا “بىزدە تەك ورىس جانە اعىلشىن ءتىلدى ءمازىر بار” دەپ جاۋاپ بەرگەن.
“ادىرنا” ءتىلشىسى وقىرماننىڭ حاتىنا قۇلاق اسا وتىرا، مەيرامحانا باسشىلىعىنا دا ساۋال جولدادى.
ءتىلشىنىڭ ساۋالىنا اتالعان باردىڭ باسشىسى رۋسلان بۋكەەۆ جاۋاپ بەردى. ايتۋىنشا، بار 1 اي بۇرىن اشىلعان. الداعى ۋاقىتتا قازاق ءتىلدى ءمازىردى دە شىعارماق.
ءبىز “Event summer” دەپ اتالاتىن بارلار جەلىسىنەن تۇرامىز. ونىڭ الماتىدا 8 شاعىن بارى بار. ونىڭ ءبىرى - وسى زاۆود بار. تەك وسى باردا عانا كسرو-نىڭ كىشكەنە بەلگىسى بەينەلەنگەن. ءبىز بۇل لوگوتيپتى قويۋىمىزدىڭ سەبەبى، قازاقستان تاريحى بويىنشا، ءبىز كسرو-دان ءبولىنىپ شىقتىق. جانە بارعا اتا-انالارىمىز، كەڭەس وداعىنىڭ كوزىن كورگەندەر كەلىپ، جاستىق شاقتارىن ەسكە السىن دەگەن نيەتتە قويدىق.
ال مازىرگە كەلسەك، ءبىز 1 اي بۇرىن عانا اشىلدىق. قازىر ورىس تىلىندە ءمازىر بار. ويتكەنى، ول ءمازىر ءالى سىناقتا. ەگەر ونداعى تاعامدار ماقۇلدانىپ وتسە، تامىزعا دەيىن قازاق تىلىندە ءمازىر جاسايمىز. ال بىزدە اعىلشىن تىلىندە ءمازىر مۇلدە جوق، دەپ جاۋاپ بەردى بار باسشىسى.
