اتىراۋ وبلىسىندا ەرالى سۋ قويماسىنان قىرىلعان بالىقتىڭ 17 كەلى ولەكسەسى شىعارىلدى، دەپ حابارلايدى "ادىرنا" ۇلتتىق پورتالى قازاقپارات-قا سىلتەمە كورسەتە وتىرىپ.
قىزىلقوعا اۋداندىق اكىمدىگىنىڭ مالىمەتىنشە، 7 شىلدەدە ەرالى سۋ قويماسىنىڭ ماڭىنداعى مەڭدىباي ۋچاسكەسىندە اقبالىق قىرىلعان.
«وقيعا ورنىنا ويىل اۋىلدىق وكرۋگىنىڭ اكىمى مەن 6 ەرىكتى بارىپ، جاعدايدى انىقتادى. ولار جەرگىلىكتى ۋاقىتپەن ساعات 12:00-19:00 ارالىعىندا سۋ قويماسىن ولگەن بالىقتان تازالاۋ جۇمىستارىن جۇرگىزدى. ەرالى سۋ كويماسىنىڭ مەڭدىباي ۋچاسكەسىنەن 17 كەلى شاماسىندا ولگەن بالىق ءسۇزىلىپ الىنىپ، ارنايى ورىنعا كومىلدى»، - دەپ حابارلادى اۋداندىق اكىمدىكتەن.
ال، بۇگىن، 8 شىلدەدە جەرگىلىكتى اتقارۋشى ورگان قىزمەتكەرلەرى مەڭدىباي ۋچاسكەسىندە قوسىمشا انىقتاۋ جۇمىستارىن جۇرگىزدى. سۋ قويماسىنىڭ باسقا ۋچاسكەلەرىنەن بالىقتىڭ ءولۋ دەرەگى انىقتالعان جوق.
«سۋ قويماسىنان قىرىلعان بالىق ولەكسەسىن جيناۋعا اتسالىسقان ەرىكتىلەردىڭ ايتۋىنا قاراعاندا، اقبالىقتار ەشقانداي اۋرۋدان نەمەسە باسقا سەبەپتەن قىرىلماعان. ولگەن شاباقتاردا ءارتۇرلى جاراقات ءىزى بار. سول سەبەپتەن، زاڭسىز بالىق اۋلاۋشىلار اۋلانعان بالىقتاردى سۋ قويماسىنا كەرى لاقتىرىپ كەتۋى مۇمكىن دەگەن بولجام جاسالىپ وتىر»، - دەپ ءمالىم ەتتى اۋداندىق اكىمدىكتەن.
بالىقتىڭ قىرىلعانى جونىندە وبلىستىق بالىق شارۋاشىلىعى باسقارماسىنا حابارلانعان. بۇگىن، 8 شىلدەدە وبلىستىق باسقارمانىڭ ماماندارى قىزىلقوعا اۋدانىنا جىبەرىلگەن ەدى.
"ادىرنا" ۇلتتىق پورتالى
ۇقساس جاڭالىقتار
