اتىراۋ وبلىسىنىڭ اكىمى سەرىك ناپكەنوۆ قۇلسارى تۇرعىندارىمەن كەزدەسىپ، ولاردىڭ ۇسىنىس-تالاپتارىن تىڭداپ، سۋ تاسقىنىنان زارداپ شەككەندەرگە كەلتىرىلگەن زالالدى وتەۋ ءتارتىبىن ءتۇسىندىردى. بۇل تۋرالى توتەنشە جاعدايلار جونىندەگى جەدەل شتاب مالىمدەدى، دەپ حابارلايدى “ادىرنا” ۇلتتىق پورتالى.
وبلىس اكىمى اپاتتى تۇرعىن ءۇيدى وتەۋ تۋرالى ۇسىنىستاردى تىڭداپ، مۇلكى اپاتتى دەپ تانىلعان زارداپ شەككەندەرگە وتەماقى نارىق قۇنى بويىنشا تولەنەتىنىن، قۇلسارى قالاسى بويىنشا زارداپ شەككەندەردىڭ ارنايى نىسانالى شوتتارىنا شامامەن 200-240 مىڭ تەڭگە تولەنەتىنىن حابارلادى.
اتىراۋ وبلىسى اكىمىنىڭ ايتۋىنشا، سۋ تاسقىنى كەزىندە زارداپ شەككەن قۇلسارى قالاسىنىڭ تۇرعىندارى اقشالاي وتەماقىلاردى نىسانالى ماقساتى بويىنشا - جاڭا تۇرعىن ءۇي ساتىپ الۋعا، تۇرعىن ءۇي سالۋعا نەمەسە جوندەۋ-قالپىنا كەلتىرۋ جۇمىستارىنا جۇمساۋعا ءتيىس.
«قازىر ءبىرىنشى كەزەكتە سۋ تاسقىنىنان زارداپ شەككەندەر باعالاۋ قورىتىندىسىمەن جانە مۇلىكتى تەحنيكالىق ساراپتاۋ قورىتىندىلارىمەن تانىسىپ، اقشالاي قاراجاتتى تولەۋگە ءوز كەلىسىمىن بەرۋى ءتيىس. تولەم ەكى اپتا ىشىندە جۇرگىزىلەدى»، - دەدى سەرىك شاپكەنوۆ جينالعاندارعا.
16 مامىر كۇنى جىلىوي اۋدانىندا 3613 وتباسى 100 اەك مولشەرىندە بىرجولعى تولەم الدى. تولەنگەن قاراجاتتىڭ جالپى سوماسى – 1 ملرد 387 ملن تەڭگە.
سونىمەن قاتار، كەلتىرىلگەن ماتەريالدىق زالال ءۇشىن وتەماقى تولەۋ ءۇشىن قۇجاتتار دايىندالادى. جىلجىمايتىن مۇلىككە تەحنيكالىق تەكسەرۋ جانە باعالاۋ جۇرگىزىلۋدە. قازىر بارلىعى 2950 ءوتىنىش قابىلدانىپ، 2697 ءوتىنىش قاراۋعا جىبەرىلدى، 2624 ۇيگە باعالاۋ جانە 2671 ۇيگە تەحنيكالىق تەكسەرۋ جۇرگىزىلدى. 756 اپاتتى ءۇي انىقتالدى. 15 مامىردان باستاپ التى ءموبيلدى توپ قۇلسارىنىڭ 100-دەن استام تۇرعىنىنىڭ ۇيلەرىنە بارىپ، سۋ تاسقىنىنان زارداپ شەككەن تۇرعىنداردىڭ مۇلكىنە كەلتىرىلگەن زالالدى باعالاۋ جانە تەحنيكالىق ساراپتاما قورىتىندىلارى بويىنشا ءتۇسىندىرۋ جۇمىستارىن جۇرگىزدى.
15 مامىردا قۇلسارىندا جىلجىمايتىن مۇلىكتى باعالاۋ جانە تەحنيكالىق ساراپتاۋ قورىتىندىلارىن جاريالاۋ بويىنشا ءموبيلدى توپتاردىڭ جۇمىسى باستالدى. جىلىوي اۋدانىنىڭ 100-دەن استام تۇرعىنى باعالاۋ پاراقتارىن الدى. ەكى كۇن ىشىندە ولار اقشالاي وتەماقى الۋعا ءوتىنىش جازا الادى. بارلىق ۇيلەر بويىنشا باعالاۋ جۇمىستارىن 10 كۇن ىشىندە اياقتاۋ جوسپارلاندى.
