بالقاشتا دارىگەر تاپشىلىعى ماسەلەسىن شەشۋگە كومەكتەسەتىن الەۋمەتتىك جوبا جالعاسۋدا. بەس بالقاشتىق قاراعاندى مەديتسينا ۋنيۆەرسيتەتىندە وقۋعا گرانت الادى. وقىتۋدى «كوۋنراد» كورپوراتيۆتىك قورى قارجىلاندىرادى.
«بۇل جوبا وتكەن جىلى ەنگىزىلدى. بەس بالقاشتىق قازىردىڭ وزىندە «كوۋنراد» قورىنىڭ ەسەبىنەن مەديتسينا ۋنيۆەرسيتەتىندە ءبىلىم الۋدا. بيىل تاعى بەس ادام – بالقاش قالاسىنداعى مەكتەپ نەمەسە مەديتسينالىق كوللەدج تۇلەكتەرى كونكۋرس ارقىلى ىرىكتەلەدى. مىندەتتى شارت – وقۋدان وتكەننەن كەيىن تۋعان قالاسىنا جۇمىسقا ورالۋ»، – دەپ حابارلادى قاراعاندى وبلىسى دەنساۋلىق ساقتاۋ باسقارماسىنىڭ بالقاش ايماقتىق بولىمىنەن.
وقۋعىسى كەلەتىندەر بار. كونكۋرسقا قاتىسۋ ءۇشىن قۇجاتتار 1 تامىز بەن 15 تامىز ارالىعىندا بالقاش قالاسى، اۋرۋحانا قالاشىعى مەكەنجايى بويىنشا ورنالاسقان دەنساۋلىق ساقتاۋ بولىمشەسىندە قابىلدانادى. انىقتاما تەلەفونى: (8-71036) 7-99-44.
ۇمىتكەرلەردى ارنايى كوميسسيا قارايدى. قوردىڭ رەسمي سايتىندا ءبىلىم گرانتىن تاعايىنداۋ ەرەجەلەرىمەن (https://kounrad.kz/download/2023.pdf) تولىق تانىسۋعا بولادى. وقىتۋ «جالپى مەديتسينا» باعدارلاماسى بويىنشا جۇرگىزىلەدى. وقۋدى بىتىرگەننەن كەيىن جاس مامان بالقاش قالاسىنىڭ ەمدەۋ مەكەمەسىندە كەمىندە 5 جىل جۇمىس ىستەۋى كەرەك.
