بەلگىلى ساياساتكەر عالىمجان جاقيانوۆتىڭ "ادىرنا" ۇلتتىق پورتالىنا سوتقا دەيىنگى شاعىم جولداپ، كاسىپكەر تولەن توقتاسىنوۆپەن بولعان سۇحباتتى پورتالدىڭ يۋتۋب ارناسىنان الىپ تاستاۋدى, سونىمەن قاتار 1 000 000 تەڭگە مورالدىك شىعىن تولەۋدى تالاپ ەتىپ وتىرعانىن حابارلاعانبىز. سوعان وراي، بەلگىلى جۋرناليست گۇلجان ەرعاليەۆا facebook-تەگى پاراقشاسىندا ءوز ويىن جازىپ، جاقيانوۆتىڭ قادامىن اۆتوكراتتىڭ ءىسى رەتىندە باعالادى، - دەپ حابارلايدى "ادىرنا" ۇلتتىق پورتالى.
قازاقتىڭ حاميت ەرعاليەۆتاي ارقالى اقىنىنىڭ قىزى، ەركىن ويلى جۋرناليست گۇلجان ەرعاليەۆانىڭ جازباسىن قازاق تىلىنە اۋدارىپ، نازارلارىڭىزعا ۇسىنامىز.
"جاقيانوۆ جۋرناليستەرمەن سوتتاسىپ جاتىر... بۇرىن سوڭدى بولماعان وزگەشە قادام. بۇل تۋرالى جازبانى "ادىرنا" ۇلتتىق پورتالىنان كورىپ، تاقىرىپقا قىزىعۋشىلىعىم ارتتى.
قاڭتار ايىندا اتالعان پورتال تولەن توقتاسىنوۆ اتتى ازاماتتان سۇحبات الىپتى، ول سۇحباتقا توقتاسىنوۆ پەن عالىمجان جاقيانوۆ اراسىنداعى بيزنەس كيكىلجىڭدەرى وزەك بولعان. بۇرىنعى دوس-سەرىكتەستەردىڭ بۇعان قالاي جەتكەنى ءوز الدىنا جەكە اڭگىمە. بايقاۋىمشا، بۇل كيكىلجىڭنەن كەروسيننىڭ ءيىسى شىعىپ تۇرعانداي. "№1 دەموكرات" سانالاتىن، ءوزىنىڭ مانيفەسى، مەملەكەتتەگى ءسوز بوستاندىعى ءۇشىن 7 جىل تۇرمەدە وتىرعانداي كورىنەتىن جاقيانوۆ جاس ءتىلشىنى سوتقا بەرسە، ول ءىس جۇزىندە ادەتتەگى اۆتوكراتقا اينالىپ شىعا كەلەتىنى انىق. قىزىعى ول ەكىنشى تاراپتى سويلەتىپ، ينتەرۆيۋ العان ءتىلشىنى «جالا جاپتىڭ» دەپ ايىپتاپ وتىر.
شىن مانىندە، جۋرناليست جالا جاۋىپ وتىرعان جوق، ول تەك تاقىرىپتى تولىق قامتۋ ءۇشىن سۇراقتار قويعان. بۇل - ونىڭ جۇمىسى. الايدا "قازاقتىڭ ماندەللاسى" ءوزىنىڭ زاڭگەرى ارقىلى اتالعان سۇحباتتى پورتالدان الىپ تاستاپ، كەشىرىم سۇراپ، ول از بولسا، وتەماقى رەتىندە 1 000 000 تەڭگە تولەۋدى تالاپ ەتىپتى. بۇل سىزدەردىڭ ەستەرىڭىزگە نەنى سالادى؟ ماعان
تاۋەلسىز باسىلىمداردىڭ ءۇنىن ءوشىرىپ، ءسوز بوستاندىعىن شەكتەيتىن حۋنبەيبين ءداۋىرى مەن نازارباەۆ ماشيناسىن ەسىمە ءتۇسىردى.
جاقيانوۆتىڭ جۋرناليستەردەن سۇراپ وتىرعان باستى تالابى نە؟ ونىڭ ويىنشا، (تەك قۇلاپ قالا كورمەڭىز) جۋرناليستەر سۇحبات الىپ، حالىققا ونى تاراتپاس بۇرىن "جابىرلەنۋشى تاراپ" سانالاتىن جاقيانوۆقا سۇحباتتىڭ مازمۇنىن كورسەتىپ، ول جەردەگى ايتىلعان فاكتىلەردىڭ شىنايىلىعىنا كوز جەتكىزىپ الۋى كەرەك ەكەن. مۇنى جاي ادام ەمەس، جاقيانوۆتىڭ زاڭگەرى جازىپ وتىر. ەگەر مەن نازارباەۆ تۋرالى بىلگىر ءبىر ادامنان سۇحبات السام، ونى جاريالاماس بۇرىن نازارباەۆقا كورسەتىپ، سۇحباتتا ايتىلعان جايلاردىڭ شىندىققا سايكەس كەلىپ-كەلمەيتىنىن انىقتاپ وتىرۋعا ءتيىس ەكەنمىن. بۇقارالىق اقپارات قۇرالدارى تۋرالى زاڭدا مۇنداي تالاپ مۇلدەم جوق، بولۋى دا مۇمكىن ەمەس. قازاقستان تاريحىندا سوتتى بولعان جۋرناليستەردىڭ تالاي ءىسىن كوردىم. بىراق، مۇنداي ابسۋرد بولۋى مۇمكىن ەكەنىن ءتىپتى ەلەستەتە الماي وتىرمىن.
كەشەگى "ار-ۇجدان تۇتقىنى" اتانعان ازاماتتىڭ قىسىمىنا ۇشىراعان تىلشىلەرگە ءبىزدىڭ قۇقىققورعاۋشىلار مەن كاسىبي جۋرناليستەردىڭ كومەگى اۋاداي قاجەت دەپ ويلايمىن. بۇل جايتقا ەلىمىزدەگى ادىلدىك جولىندا كۇرەسىپ جۇرگەن جۋرناليستەر، ء"ادىل ءسوز" قورى، باسقا دا كاسىپتىك ۇيىمدار نازار سالسا دەيمىن. سونىمەن قاتار، پورتالدىڭ جۋرناليستەرى "وپپوزيتسيانىڭ اڭىزىنا" اينالعان جاقيانوۆتىڭ الدىندا باس يگىسى كەلمەي وتىرعانىن بايقادىم. سول ءۇشىن دە ولاردى قۇرمەتتەپ، ءوز سالەمىمدى جولداعىم كەلەدى.
بۇعان دەيىن، 2023 جىلدىڭ 2-قاڭتارى كۇنى “ادىرنا” ۇلتتىق پورتالىنىڭ يۋتۋب ارناسىندا "عالىمجان جاقيانوۆقا سەنىپ ەدىم" دەگەن تاقىرىپپەن كاسىپكەر توقتاسىنوۆ تولەن مۇحامەديۇلىنىڭ سۇحباتى جاريالانعان بولاتىن.
https://youtu.be/hqlrELQ3QJw?list=TLGGr7oPD-pJtJ4wMjA4MjAyMw
سونداي-اق، وسىعان دەيىن جاقيانوۆتىڭ جاعدايىنا قاتىستى جاي-جاپسار باياندالعان ماقالا سايتىمىزعا شىقتى.
ۇقساس جاڭالىقتار
"ادىرنا" ۇلتتىق پورتالى
