Belgili saıasatker Ǵalymjan Jaqııanovtyń "Adyrna" ulttyq portalyna sotqa deıingi shaǵym joldap, kásipker Tólen Toqtasynovpen bolǵan suhbatty portaldyń ıýtýb arnasynan alyp tastaýdy, sonymen qatar 1 000 000 teńge moraldik shyǵyn tóleýdi talap etip otyrǵanyn habarlaǵanbyz. Soǵan oraı, belgili jýrnalıst Gúljan Erǵalıeva facebook-tegi paraqshasynda óz oıyn jazyp, Jaqııanovtyń qadamyn avtokrattyń isi retinde baǵalady, - dep habarlaıdy "Adyrna" ulttyq portaly.
Qazaqtyń Hamıt Erǵalıevtaı arqaly aqynynyń qyzy, erkin oıly jýrnalıst Gúljan Erǵalıevanyń jazbasyn qazaq tiline aýdaryp, nazarlaryńyzǵa usynamyz.
"Jaqııanov jýrnalıstermen sottasyp jatyr... Buryn sońdy bolmaǵan ózgeshe qadam. Bul týraly jazbany "Adyrna" ulttyq portalynan kórip, taqyrypqa qyzyǵýshylyǵym artty.
Qańtar aıynda atalǵan portal Tólen Toqtasynov atty azamattan suhbat alypty, ol suhbatqa Toqtasynov pen Ǵalymjan Jaqııanov arasyndaǵy bıznes kıkiljińderi ózek bolǵan. Burynǵy dos-seriktesterdiń buǵan qalaı jetkeni óz aldyna jeke áńgime. Baıqaýymsha, bul kıkiljińnen kerosınniń ıisi shyǵyp turǵandaı. "№1 demokrat" sanalatyn, óziniń manıfesi, memlekettegi sóz bostandyǵy úshin 7 jyl túrmede otyrǵandaı kórinetin Jaqııanov jas tilshini sotqa berse, ol is júzinde ádettegi avtokratqa aınalyp shyǵa keletini anyq. Qyzyǵy ol ekinshi tarapty sóıletip, ıntervıý alǵan tilshini «jala japtyń» dep aıyptap otyr.
Shyn máninde, jýrnalıst jala jaýyp otyrǵan joq, Ol tek taqyrypty tolyq qamtý úshin suraqtar qoıǵan. Bul - onyń jumysy. Alaıda "qazaqtyń Mandellasy" óziniń zańgeri arqyly atalǵan suhbatty portaldan alyp tastap, keshirim surap, ol az bolsa, ótemaqy retinde 1 000 000 teńge tóleýdi talap etipti. Bul sizderdiń esterińizge neni salady? Maǵan táýelsiz basylymdardyń únin óshirip, sóz bostandyǵyn shekteıtin Hýnbeıbın dáýiri men Nazarbaev mashınasyn esime túsirdi.
Jaqııanovtyń jýrnalısterden surap otyrǵan basty talaby ne? Onyń oıynsha, (tek qulap qala kórmeńiz) jýrnalıster suhbat alyp, halyqqa ony taratpas buryn "jábirlenýshi tarap" sanalatyn Jaqııanovqa suhbattyń mazmunyn kórsetip, ol jerdegi aıtylǵan faktilerdiń shynaıylyǵyna kóz jetkizip alýy kerek eken. Muny jaı adam emes, Jaqııanovtyń zańgeri jazyp otyr. Eger men Nazarbaev týraly bilgir bir adamnan suhbat alsam, ony jarııalamas buryn Nazarbaevqa kórsetip, suhbatta aıtylǵan jaılardyń shyndyqqa sáıkes kelip-kelmeıtinin anyqtap otyrýǵa tıis ekenmin. Buqaralyq aqparat quraldary týraly zańda mundaı talap múldem joq, bolýy da múmkin emes. Qazaqstan tarıhynda sotty bolǵan jýrnalısterdiń talaı isin kórdim. Biraq, mundaı absýrd bolýy múmkin ekenin tipti elestete almaı otyrmyn.
Keshegi "ar-ujdan tutqyny" atanǵan azamattyń qysymyna ushyraǵan tilshilerge bizdiń quqyqqorǵaýshylar men kásibı jýrnalısterdiń kómegi aýadaı qajet dep oılaımyn. Bul jaıtqa elimizdegi ádildik jolynda kúresip júrgen jýrnalıster, "Ádil sóz" qory, basqa da kásiptik uıymdar nazar salsa deımin. Sonymen qatar, portaldyń jýrnalısteri "oppozıııanyń ańyzyna" aınalǵan Jaqııanovtyń aldynda bas ıgisi kelmeı otyrǵanyn baıqadym. Sol úshin de olardy qurmettep, óz sálemimdi joldaǵym keledi.
Buǵan deıin, 2023 jyldyń 2-qańtary kúni “Adyrna” ulttyq portalynyń Iýtýb arnasynda "Ǵalymjan Jaqııanovqa senip edim" degen taqyryppen kásipker Toqtasynov Tólen Muhamedıulynyń suhbaty jarııalanǵan bolatyn.
Sondaı-aq, osyǵan deıin Jaqııanovtyń jaǵdaıyna qatysty jaı-japsar baıandalǵan maqala saıtymyzǵa shyqty.
"Adyrna" ulttyq portaly
