جەتىسۋ وبلىسىنىڭ ساۋدا جانە تۇتىنۋشىلار قۇقىقتارىن قورعاۋ دەپارتامەنتى حالىق كوپ شوعىرلانعان ورىنداردا تۇتىنۋشىلار قۇقىقتارىن قورعاۋ بويىنشا اقپاراتتىق-تۇسىندىرمەلى كەڭەس بەرۋ شارالارىن ۇيىمداستىرۋدا.
وسى ورايدا، شىلدە ايىندا دەپارتامەنت مامانى ءمادىدوللدا قايروللاۇلى تالدىقورعان قالاسىنىڭ جاستارعا قىزمەت كورسەتۋ ورتالىعىنىڭ عيماراتىندا تۇتىنۋشىلارعا كەڭەس بەرۋ جۇمىستارىن جۇرگىزدى.
شارا بارىسىندا دەپارتامەنت مامانى تۇتىنۋشىلاردىڭ ساۋالدارىنا جاۋاپ بەرىپ، «قر تۇتىنۋشىلار قۇقىقتارىن قورعاۋ تۋرالى» زاڭ جوباسىنداعى جاڭالىقتار تۋرالى اقپارات بەردى.
تۇتىنۋشىلاردىڭ ءبىرى جاقىندا ءوز باسىنان وتكەن وقيعا جايلى ايتىپ ءوتتى. دارىحاناعا بارىپ بالالارعا ارنالعان تاعامتانۋ ۇلگىسىن العان، الايدا باسقا ءدارىحانادا وسى تاۋار ءتۇرى بىرنەشە ەسە ارزان بولعاندىقتان ءبىرىنشى العان دارىحاناعا قايتا بارىپ، تاۋارىن قايتارىپ، اقشاسىن قايتارۋدى سۇراعان. الايدا دارىحاناداعى فارماتسەۆت بالالار تاعامى بۇل «دارىلىك پرەپارات» جانە زاڭعا سايكەس قايتارىلمايدى دەپ جەتكىزىپ، تۇتىنۋشىنى الداعان. وسى رەتتە دەپارتامەنت مامانى دارىلىك پرەپاراتتار تىزبەگىندەگى جوق تاۋارلار ءدارىحانادا ساتىلسا دا ول «قر تۇتىنۋشىلار قۇقىقتارىن قورعاۋ تۋرالى» زاڭىنىڭ 14 جانە 30 بابتارىنا سايكەس قايتارىلۋ قاجەتتىگىن اتاپ ءوتتى.
قۇرمەتتى تۇتىنۋشىلار، ءدارىحانادا وسىنداي جاعدايعا تاپ بولساڭىزدار، ءبىزدىڭ دەپارتامەنتكە حابارلاسىپ ءوتىنىش بىلدىرسەڭىزدەر بولادى.
فوتو: سgon.rospotrebnadzor.ru
