دەپۋتاتتار كوپبالالى انالارعا ءۇي بەرەتىن زاڭ جوباسىن ماقۇلدادى

بۇگىن ءماجىلىس كوپبالالى وتباسىلار مەن كوپبالالى انالارعا ءبىرىنشى كەزەكتە باسپانا الۋ قۇقىعىن بەرەتىن زاڭ جوباسىن ماقۇلداپ، سەناتقا جىبەردى، دەپ حابارلايدى Sputnik قازاقستان تىلشىسى.

دەپۋتات شاۆحات وتەمىسوۆتىڭ ايتۋىنشا، زاڭ جوباسىنا ساتىپ الۋ قۇقىعىنسىز جالعا بەرىلەتىن تۇرعىن ءۇي ۇعىمى ەنگىزىلگەن. بۇل تابىسى تومەن حالىقتىڭ الەۋمەتتىك وسال توبىنا ارنالعان ساتىپ الۋ قۇقىعىنسىز جالعا بەرىلەتىن تۇرعىن ءۇيدىڭ تۇراقتى كوممۋنالدىق قورىن قۇرۋعا مۇمكىندىك بەرەدى.

كوپبالالى وتباسىلار كەزەككە تۇرادى

"التىن القا", "كۇمىس القا" القالارىمەن ناگرادتالعان نەمەسە "باتىر انا", سونداي-اق، ءى جانە ءىى دارەجەلى انا داڭقى اتاعىن العان كوپبالالى انالار جانە كوپبالالى وتباسىلار ساناتى ءۇشىن تۇرعىن ءۇي الۋعا جەكە كەزەكتىلىك ەنگىزۋ كوزدەلىپ وتىر", - دەدى ماجىلىسمەن.

ونىڭ ايتۋىنشا، قازىرگى ۋاقىتتا 31 725 كوپبالالى وتباسى كەزەكتە تۇر. كوپبالالى وتباسىلاردى جالعا بەرىلەتىن باسپانامەن قامتۋ ءۇشىن "نۇرلى جەر" باعدارلاماسى بويىنشا جىل سايىن 50 ميلليارد تەڭگە بولىنبەك. ناتيجەسىندە جىلىنا كەمىندە 6 مىڭ پاتەر سالىنادى.

جاستاردى باسپانامەن قامتۋ

سونىمەن قاتار، زاڭ جوباسىندا جۇمىس ىستەيتىن جاستاردى قولجەتىمدى باسپانامەن قامتۋ ماسەلەسى قارالعان.

"نۇرلى جەر" اياسىندا 2019-2025 جىلدارى نۇر-سۇلتان، الماتى، شىمكەنت قالالارىندا ەڭبەك ەتەتىن جاستار ءۇشىن جىل سايىن كەمىندە ءبىر مىڭ جالعا بەرىلەتىن باسپانا سالۋ جوسپارلانىپ وتىر. جۇمىس ىستەيتىن جاستار ءۇشىن بۇل جاقسى مۇمكىندىك", - دەدى وتەمىسوۆ.

دەپۋتات تۇرعىن ءۇي قاتىناستارى تۋرالى زاڭ جوباسى كوپبالالى وتباسىلار مەن جۇمىس ىستەيتىن جاستاردىڭ تۇرعىن ءۇي جاعدايىن جاقسارتۋعا، ءال-اۋقاتىن جانە ءومىر ءسۇرۋ دەڭگەيىن ارتتىرۋعا ىقپال ەتەتىنىن تىلگە تيەك ەتتى.

ءماجىلىس زاڭ جوباسىن ماقۇلداپ، سەناتقا جولدادى.

Sputnik