Kópbalaly otbasylar baspana alý úshin jeke kezekke turady
Búgin májilis kópbalaly otbasylar men kópbalaly analarǵa birinshi kezekte baspana alý quqyǵyn beretin zań jobasyn maquldap, senatqa jiberdi, dep habarlaıdy Sputnik Qazaqstan tilshisi.
Depýtat Shavhat Ótemisovtiń aıtýynsha, zań jobasyna satyp alý quqyǵynsyz jalǵa beriletin turǵyn úı uǵymy engizilgen. Bul tabysy tómen halyqtyń áleýmettik osal tobyna arnalǵan satyp alý quqyǵynsyz jalǵa beriletin turǵyn úıdiń turaqty kommýnaldyq qoryn qurýǵa múmkindik beredi.
Kópbalaly otbasylar kezekke turady
"Altyn alqa", "Kúmis alqa" alqalarymen nagradtalǵan nemese "Batyr ana", sondaı-aq, I jáne II dárejeli ana dańqy ataǵyn alǵan kópbalaly analar jáne kópbalaly otbasylar sanaty úshin turǵyn úı alýǵa jeke kezektilik engizý kózdelip otyr", - dedi májilismen.
Onyń aıtýynsha, qazirgi ýaqytta 31 725 kópbalaly otbasy kezekte tur. Kópbalaly otbasylardy jalǵa beriletin baspanamen qamtý úshin "Nurly jer" baǵdarlamasy boıynsha jyl saıyn 50 mıllıard teńge bólinbek. Nátıjesinde jylyna keminde 6 myń páter salynady.
Jastardy baspanamen qamtý
Sonymen qatar, zań jobasynda jumys isteıtin jastardy qoljetimdi baspanamen qamtý máselesi qaralǵan.
"Nurly jer" aıasynda 2019-2025 jyldary Nur-Sultan, Almaty, Shymkent qalalarynda eńbek etetin jastar úshin jyl saıyn keminde bir myń jalǵa beriletin baspana salý josparlanyp otyr. Jumys isteıtin jastar úshin bul jaqsy múmkindik", - dedi Ótemisov.
Depýtat turǵyn úı qatynastary týraly zań jobasy kópbalaly otbasylar men jumys isteıtin jastardyń turǵyn úı jaǵdaıyn jaqsartýǵa, ál-aýqatyn jáne ómir súrý deńgeıin arttyrýǵa yqpal etetinin tilge tıek etti.
Májilis zań jobasyn maquldap, senatqa joldady.
Sputnik
