بەلگىلى ايتىسكەر اقىن، قر ءماجىلىسىنىڭ دەپۋتاتى امانجول التاەۆ جۋىردا قىرعىزستان پرەزيدەنتى ات مىنگىزگەن قازاق اقىنى ءبىرجان قالدىباەۆقا شۇيلىكتى. ول قىرعىز پرەزيدەنتىنەن سىيلىق العان قازاق اقىنىنان بارشا ايتىس اقىندارىنان كەشىرىم سۇراۋدى تالاپ ەتتى، دەپ حابارلايدى "ادىرنا" ۇلتتىق پورتالى.
- مىناۋ ءبىرجان دەگەن ۇياتى جوق، بەتى قالىڭ جىگىت ەكەن. ونىڭ مۇقىم قازاق ەلىنىڭ اتىنان دومبىرا ۇستاپ سويلەيتىندەي ءجونى جوق ەدى. سەبەبى قازاق ايتىس ونەرىندە مۇنداي اقىن جوق، - دەپ جازدى امانجول التاەۆ.
Cونىمەن قاتار، امانجول التاەۆ قىرعىز تاراپىن دا تۇيرەپ ءوتتى. ايىر قالپاقتى اعايىندى ەكى ەلدىڭ ايتىس اقىندارى وداعىنىڭ اراسىنداعى قول قويىلعان مەموراندۋم ەرەجەسىن ساقتاۋعا شاقىردى.
«قىرعىز باۋىرلاردىڭ ىستىق پەيىلىنە راقمەت! بىراق، كىم كورىنگەندى كوشەدەن تاۋىپ الىپ، قازاق ەلىنىڭ اقىنى دەپ ەل الدىنا شىعارماۋىن سۇرايمىز. قازاق ەلىنىڭ ايتىس اقىندارى مەن جىرشى - تەرمەشىلەر وداعىنىڭ توراعاسىنىڭ ءبىرىنشى ورىنباسارى رەتىندە مالىمدەيمىن. قازاق حالقىنىڭ بەكزات ونەرىنىڭ قۇنىن ولاي تۇسىرمەۋلەرىن تالاپ ەتەمىن. اقىندىق تالانتى جوق مۇنداي پىسىقايلار ەشكىمگە دە وپا اپەرمەيدى. ەندىگى جەردە قىرعىز باۋىرلار ەكى ەلدىڭ ايتىس اقىندارى وداعىنىڭ اراسىنداعى قول قويىلعان مەموراندۋمداعى ەرەجەنى ساقتاۋدى، بىزدەر ۇسىنعان اقىندى عانا حالىق الدىنا شىعارۋلارىن سۇرايمىز.
قۇستىڭ قوس قاناتىنداي باۋىرلاس ەدىڭ دوستىعىن جالعان ولەڭشىلەر ەمەس، ناعىز قۇرمەتكە لايىق دارىندى اقىندار جىرلاسىن. ءبىرجان باۋىرىمىز ەلگە جەتكەنسىن حالىقتان، بارشا ايتىس اقىندارىنان كەشىرىم سۇراۋدى ۇمىتپاسىن»، - دەپ جازدى ول.
كەيىننەن ءوزىنىڭ نە سەبەپتى ايتىسكەردى سىنعا العانىن "حالىق ءۇنى" پورتالىنا ايتىپ, كوپشىلىك الدىندا اشىق كوزقاراسىن تانىتتى.
- پوست جازۋىما سەبەپ بولعان نارسە، مەن ايتىس اقىندارى مەن جىرشى-تەرمەشىلەردىڭ حالىقارالىق وداعى باسقارما توراعاسىنىڭ ءبىرىنشى ورىنباسارىمىن. ايتىس ونەرىنىڭ باعىت-باعدارىنىڭ دۇرىس جۇرۋىنە سول باسقارمانىڭ باسشىلارىنىڭ ءبىرى رەتىندە جاۋاپتىمىن دەپ ويلايمىن. سوندىقتان قانداي دا ءبىر تۇسىنىسپەستىك تۋماۋى كەرەك. ءبىرجان دەگەن جاس جىگىتتىڭ ونەرىنە، الدىنا كەسە كولدەنەڭ تۇرعىم كەلىپ تۇرعان جوق. ماسەلە، جەر بەتىندەگى حالىقتاردىڭ ىشىندە قازاق دەگەن ۇلتتى دارالايتىن، ءبىزدىڭ ساف ونەرىمىز، بەكزات ونەرىمىز، اتامۇرا ونەرىمىز – ايتىس. سوندىقتان ايتىستىڭ بەكزات بولمىسىنا قىلاۋ تۇسىرمەۋگە بۇكىل اقىندار جاۋاپتى دەپ ويلايمىن. اشىپ ايتۋىمىز كەرەك، ءبىرجان دەگەن بالانىڭ قىرعىز حالقىنىڭ الدىندا، پرەزيدەنتىنىڭ الدىندا ارناۋ ايتقانىنا قارسى ەمەسپىن. ونىڭ سول ارناۋدى قالاي ايتقانىندا. بىرىنشىدەن، مەن ول بالانىڭ بويىنان ەشقانداي اقىندىق ونەردى بايقاپ تۇرعان جوقپىن. شاتپاق ولەڭ، نە ۇيقاسىندا، نە ويىندا جۇيە جوق. ارناۋدىڭ نەگىزگى ماقساتى – قىرعىزدىڭ پرەزيدەنتىنەن ات سۇراۋ ءۇشىن بارعان سەكىلدى كورىندى. سوندىقتان ول جىگىت ارقىلى قازاق ايتىسى تۋرالى باۋىرلاس قىرعىز حالقىنىڭ پىكىرى قالىپتاسادى. وسى جاعىن ويلاۋ كەرەك ەدى، ارينە، ولەڭى كەلىستى بولسا، ەكى ەلدىڭ دوستىعىن تامىلجىتىپ تۇرىپ، قازاقتىڭ اتا داستۇرىمەن جىرلاپ جاتسا، وعان ءبارىمىز قۋاناتىن ەدىك. تالانتسىز ادامنىڭ قولىنا دومبىرا الىپ، كەلەلى جيىنداردا سويلەۋى دۇرىس ەمەس دەپ ەسەپتەيمىن. ايتىستىڭ ابىرويىن قورعاۋ ءۇشىن ايتىس اقىندارى اتىنان پىكىرىمدى ءبىلدىرۋدى ءجون دەپ تاپتىم، - دەپ ءتۇسىندىردى امانجول التاەۆ.
ورايى كەلگەندە ايتا كەتەيىك، 13 تامىزدا قازاق اقىنى ءبىرجان قالدىباەۆ چولپون-اتادا وتكەن كوكپاردان الەم چەمپيوناتىنىڭ اشىلۋ سالتاناتىندا ونەر كورسەتىپ، سادىر جاپاروۆقا ارناپ ءسوز سويلەپ، ەكى حالىقتىڭ دوستىعىن جىرلاعان بولاتىن.
قىرعىز پرەزيدەنتى سادىر جاپاروۆ سول جيىندا قازاق اقىنىنا قۇرمەتى رەتىندە سىيلىق تابىستايتىنىن ايتىپ، 20 تامىزدا قىرعىزستان پرەزيدەنتىنىڭ كومەكشىسى قانىبەك تۇمونباەۆ سادىر جاپاروۆتىڭ سىيلاعان cايگۇلىگىن ءبىرجان قالدىباەۆقا تارتۋ ەتتى.
''ادىرنا" ۇلتتىق پورتالى
