بۇگىن — قازاقستان رەسپۋبليكاسىنىڭ كونستيتۋتسياسى كۇن.
قازىرگى كونستيتۋتسيا جالپىحالىقتىق رەفەرەندۋم نەگىزىندە 1995 جىلدىڭ 30 تامىزىندا قابىلدانىپ، 5 قىركۇيەگىندە كۇشىنە ەندى. وعان 1998 جىلى جانە 2007 جىلى تولىقتىرۋلار مەن وزگەرتۋلەر ەنگىزىلدى. اتا زاڭ – 9 تاراۋ جانە 98 باپتان تۇرادى.
بۇىنگى تاڭدا قازاقستاننىڭ اتا زاڭى الەمدەگى ەڭ جاس كونستيتۋتسيالاردىڭ ءبىرى بولىپ سانالادى.
مەملەكەت باسشىسى قاسىم-جومارت توقاەۆ قازاقستاندىقتاردى كونستيتۋتسيا كۇنىمەن قۇتتىقتاۋىندا اتا زاڭنىڭ باستى قۇجات ەكەنىن اتاپ ءوتتى.
«اتا زاڭ – مەملەكەتتىلىگىمىزدىڭ مىزعىماس تىرەگى ءارى ەلىمىزدىڭ ساياسي جانە قوعامدىق قۇرىلىسىن، اينىماس قۇندىلىقتارى مەن دامۋ جولىنداعى ستراتەگيالىق باعىت-باعدارىن ايقىندايتىن باستى قۇجاتىمىز. جالپىۇلتتىق رەفەرەندۋم ارقىلى جاڭارتىلعان كونستيتۋتسيامىز ۇلتتى ۇيىستىرۋدىڭ ناعىز سيمۆولىنا اينالدى. سونداي-اق نەگىزگى زاڭىمىز ەلدىڭ ساياسي جۇيەسىن دەموكراتيالاندىرۋدى، زاڭ ۇستەمدىگىن قامتاماسىز ەتۋدى جانە حالىقتىڭ ءال-اۋقاتىن ارتتىرۋدى كوزدەيتىن اۋقىمدى وزگەرىستەردىڭ بەرىك تۇعىرى سانالادى. كونستيتۋتسيالىق سوتتىڭ قۇرىلۋى – وسىنداي ينستيتۋتسيونالدى رەفورمانىڭ ءبىرى. بۇل قۇرىلىم ازاماتتاردىڭ قۇقىقتارى مەن بوستاندىقتارى قورعالاتىنىنا ءاردايىم كەپىلدىك بەرەتىن اتا زاڭىمىزدىڭ ءرولىن مەيىلىنشە ارتتىردى»،—دەدى مەملەكەت باسشىسى.پرەزيدەنت ادىلەتتى قازاقستاندى قۇرۋدا كونستيتۋتسيانىڭ ەرەكشە ورىن الاتىنىن ايتتى.
«جالپىعا بىردەي جول اشاتىن ادىلەتتى قازاقستاندى قۇرۋ ءۇشىن كونستيتۋتسيا قاعيدالارى قاتاڭ ساقتالىپ قانا قويماي، قوعامنىڭ سانا-سەزىمىنە ءبىرجولا ورنىعۋعا ءتيىس. «ادال ازامات» دەگەن اتقا لايىق ءاربىر ادام اتا زاڭنىڭ بيىك مۇراتتارىن قولدايتىنىنا جانە ونى ومىرلىك ۇستانىمىنا اينالدىراتىنىنا نىق سەنىمدىمىن. بارشاڭىزعا زور دەنساۋلىق، باق-بەرەكە جانە تولاعاي تابىس تىلەيمىن!»—دەپ تۇيىندەدى ول.
ۇقساس جاڭالىقتار
