تۇركىستان وبلىسىنىڭ اكىمى دارحان ساتىبالدى قىتاي حالىق رەسپۋبليكاسىنان كەلگەن كاسىپكەرلەرمەن كەزدەسىپ، بىرنەشە جوبانى تالقىلادى. ناتيجەسىندە تۇركىستان وبلىسى مەن قىتاي تاۋار وندىرۋشىلەرى ەكىجاقتى بايلانىستى دامىتىپ، بىرلەسكەن جوبالار اشىپ، تاجىريبەمەن ءبولىسۋ بويىنشا مەموراندۋمدارعا قول قويدى. اتاپ ايتقاندا، اۋىل شارۋاشىلىعى تەحنيكالارىن قۇراستىرۋ، كابەل جەلىسىن جاساۋ، ەلەكتر كولىكتەرىن زاريادتاۋ ستانتسيالارى، تىگىن فابريكاسىن اشۋ بويىنشا جالپى سوماسى 3 ملرد. تەڭگەدەن استام قارجىعا كاسىپورىندار اشۋ بويىنشا يندۋستريالدى ايماق جانە ارنايى ەكونوميكالىق ايماق باسشىلىعىمەن مەموراندۋمدار ءتۇزىلدى.
– تۇركىستان ءوڭىرى ورتالىق ازياداعى بيزنەستى كەڭەيتۋدىڭ جاڭا كوكجيەگى بولىپ سانالادى. قازاقستان مەن قىتاي اراسىنداعى قارىم-قاتىناس سوڭعى جىلدارى تەك نىعايا تۇسۋدە. بۇگىنگى ءوتىپ جاتقان كورمە قازاق-قىتاي كاسىپكەرلەرى اراسىندا وڭ ناتيجەلەر بەرەتىنىنە سەنىمدىمىن. قىتاي ەلىنىڭ باي تاجىريبەسى تۇركىستان ءوڭىرىنىڭ الەۋەتىن كوتەرۋگە زور مۇمكىندىك بەرەدى. وسىعان دەيىن قىتايعا جۇمىس ساپارىمەن بارىپ، وزدەرىڭىزبەن جۇزدەسىپ ەدىك. ءبىراز ماڭىزدى جوبالاردى تالقىلادىق. بۇگىنگى كەزدەسۋ سول ساپاردىڭ جەمىسى دەپ بىلەمىز. ءبىزدىڭ اۋدان اكىمدەرى قىتايداعى ءىرى ءوندىرىس ورىندارىن ارالاپ، تاجىريبە جيناۋىن جالعاستىرىپ جاتىر. وسى تاجىريبەلەرىمىزدى جيناقتاپ، وبلىس اۋماعىندا زاۋىت-فابريكالار اشۋدى كوزدەپ وتىرمىز،– دەدى تۇركىستان وبلىسىنىڭ اكىمى دارحان ساتىبالدى.
