وزبەكستاندا دەپۋتاتتار كوپ ايەل الۋعا جانە ادامنىڭ سىرت كەلبەتىن انىقتاۋعا مۇمكىندىك بەرمەيتىن جابىق كيىم كيۋگە تىيىم سالاتىن زاڭ جوباسىن قابىلدادى، دەپ حابارلايدى "ادىرنا" سايتى.
زاڭدا ازاماتتاردىڭ ۇلتتىق، ناسىلدىك، ەتنيكالىق نەمەسە ءدىني قاتىستىلىعىنا قاراي ارتىقشىلىعىن نەمەسە كەمسىتۋدى ناسيحاتتاعانى ءۇشىن جاۋاپكەرشىلىك بەلگىلەۋ كوزدەلەدى.
بۇدان باسقا، نەكەسىن زاڭدى تارتىپپەن تىركەمەي، ءدىني راسىممەن نەكەلەسكەنى ءۇشىن جاۋاپكەرشىلىك ەنگىزىلەدى.
دەپۋتاتتار وزبەكستاندا ءدىن بويىنشا نەكەگە تۇرا سالاتىنداردىڭ سانى ارتىپ كەلە جاتقانىن، سونىڭ سالدارىنان كوپ ايەل الۋ جاعدايلارى ءجيى كەزدەسەتىنىن اتاپ ءوتتى.
پارلامەنتتىڭ تومەنگى پالاتاسىنىڭ مالىمەتى بويىنشا، نەكەسىز تۋعان بالالاردىڭ سانى دا ءوستى. وزبەكستان بويىنشا 2022 جىلى 18 955 بالا نەكەسىز تۋعان تىركەلدى. 2021 جىلى 19 037 بالا، ال 2020 جىلى 16 564 بالا نەكەسىز تىركەلگەن.
احاج ورگاندارىندا تىركەلمەگەن نەكە اكە بولۋدى بەلگىلەۋگە، اليمەنت تاعايىنداۋعا، مۇراعا بايلانىستى پروبلەمالارعا اكەپ سوعادى.
زاڭدا ەكى نەمەسە ودان دا كوپ ايەلمەن بىرگە تۇرۋدى ناسيحاتتاۋ، سونداي-اق ايەلدەر مەن ەرلەردىڭ تەڭ قۇقىقتارىن اشىق تۇردە جوققا شىعارعاندارعا اكىمشىلىك جاۋاپكەرشىلىك قاراستىرىلعان.
سونداي-اق قوعامدىق ورىنداردا ازاماتتاردىڭ جەكە باسىن انىقتاۋعا مۇمكىندىك بەرمەيتىن كيىم كيگەنى ءۇشىن اكىمشىلىك جاۋاپكەرشىلىك ەنگىزىلەدى.
