Ózbekstanda depýtattar kóp áıel alýǵa jáne adamnyń syrt kelbetin anyqtaýǵa múmkindik bermeıtin jabyq kıim kııýge tyıym salatyn zań jobasyn qabyldady, dep habarlaıdy "Adyrna" saıty.
Zańda azamattardyń ulttyq, násildik, etnıkalyq nemese dinı qatystylyǵyna qaraı artyqshylyǵyn nemese kemsitýdi nasıhattaǵany úshin jaýapkershilik belgileý kózdeledi.
Budan basqa, nekesin zańdy tártippen tirkemeı, dinı rásimmen nekeleskeni úshin jaýapkershilik engiziledi.
Depýtattar Ózbekstanda din boıynsha nekege tura salatyndardyń sany artyp kele jatqanyn, sonyń saldarynan kóp áıel alý jaǵdaılary jıi kezdesetinin atap ótti.
Parlamenttiń tómengi palatasynyń málimeti boıynsha, nekesiz týǵan balalardyń sany da ósti. Ózbekstan boıynsha 2022 jyly 18 955 bala nekesiz týǵan tirkeldi. 2021 jyly 19 037 bala, al 2020 jyly 16 564 bala nekesiz tirkelgen.
AHAJ organdarynda tirkelmegen neke áke bolýdy belgileýge, alıment taǵaıyndaýǵa, muraǵa baılanysty problemalarǵa ákep soǵady.
Zańda eki nemese odan da kóp áıelmen birge turýdy nasıhattaý, sondaı-aq áıelder men erlerdiń teń quqyqtaryn ashyq túrde joqqa shyǵarǵandarǵa ákimshilik jaýapkershilik qarastyrylǵan.
Sondaı-aq qoǵamdyq oryndarda azamattardyń jeke basyn anyqtaýǵa múmkindik bermeıtin kıim kıgeni úshin ákimshilik jaýapkershilik engiziledi.
