بارشا قازاقستاندىقتاردى كۇتتىرگەن فۋتبول ويىنى 7 قىركۇيەكتە ەلوردادا وتكەن بولاتىن. ماتچتا تارتىستى باسەكەنى ايلاپ كۇتكەن فۋتبول سۇيەر قاۋىممەن بىرگە، ويىندى پايدالانىپ، "قوسىمشا اقشا" جاساعان ازاماتتار بولعان، دەپ حابارلايدى "ادىرنا" ءتىلشىسى.
7 قىركۇيەكتە "استانا ارەنا" ستاديونىندا فينليانديا قۇراماسىنا قارسى قازاقستان قۇراماسىنىڭ فۋتبول ماتچى ءوتتى. ەستەرىڭىزگە سالا كەتەيىك، ۇلتتىق قۇراما فيندەردىڭ پايداسىنا 0:1 ەسەبىمەن جەڭىلدى. الايدا، جانكۇيەرلەر جەڭىلىسكە عانا اشۋلى ەمەس. فۋتبول كورۋگە كەلگەن كورەرمەندەر ءىس-شارادا قوسىمشا اقشا تاۋىپ ۇلگەرگەن ازاماتتارعا دا اشۋلانىپ، كوڭىلى قالعاندارىن ايتۋدا.
قازاقستاندىق قۇراما ءۇشىن ەۋرو-2024 ىرىكتەۋ ماتچىنىڭ بارلىق بيلەتتەرى تامىز ايىندا تولىق ساتىلىپ كەتكەن. الايدا ءىس-شاراعا كەلۋشى ءارى تۋريزم سالاسىنىڭ مامانى نۇريكا وشاقباەۆا Facebook پاراقشاسىندا بيلەتتەردىڭ ءبىر بولىگىن ماتچ الدىندا ساتۋدى شەشكەن ديلەرلەر وتە قىمبات باعامەن ساتقان. نۇريكانىڭ ايتۋىنشا، قۇنى ءبىر جارىم-ەكى مىڭ تەڭگە بولاتىن بيلەتتى شىنايى جانكۇيەرلەر ونداعان ەسە قىمبات باعاعا ساتىپ الۋعا ءماجبۇر بولعان.
فۋتبول ويىنىن تاماشالاۋعا كەلگەندەردىڭ اراسىندا تەگىن دۇنيەدەن اقشا جاساعاندار دا انىقتالدى. كەي جانكۇيەرلەر ازىلكەش، تەلەجۋرناليست نۇرلان قويانباەۆ تاراتقان تەگىن تۋدى ساتۋمەن اينالىسقان. ويىندى پايدالانىپ، كوك بايراقتى 3-4 مىڭ تەڭگەگە ساتقانى بەلگىلى بولدى. بۇل تۋرالى نۇريكا وشاقباەۆا ءوزىنىڭ الەم جەلىدەگى پاراقشاسىندا ءبولىستى.
"ەكىنشى، ستاديون الدىندا مەملەكەتتىك تۋدى 3-4 مىڭ تەڭگەگە ساتىپ جاتقانداردى كوردىم. بۇل جالاۋشانى نۇرلان قويانباەۆ فۋتبول فەدەراتسياسىمەن بىرلەسە وتىرىپ، ستاديونعا ءىلۋ ءۇشىن تەگىن تاراتقان. الايدا ەرتە كەلگەن كورەرمەندەر جالاۋلاردى جيناپ الىپ، ماتچ باستالار الدىندا ونى دا ساتتى. ايتارعا ءسوزىم جوق!" - دەدى.
ال نۇرلان قويانباەۆ تاراتىلعان كوك تۋدى ارنايى تۇركيادان، قىتايدان تىكتىرتىپ، ستاديوننىڭ ادەمى بولۋى ءۇشىن ويلاستىرىلعان ءىس ەكەنىن ايتادى.
"3 اي بۇرىن دايىندالدىم. قازاقستان قۇراما كومانداسى ويىندارى كۇزدە بولاتىنىن بىلەمىن. كوك تۋلاردى ساتىپ الىپ تاراتايىن دەگەنمىن. قاراسام، قازاقستاندا ونداي جوق ەكەن. ءبىر دۇكەندە 100-ءى بار، ەكىنشى دۇكەندە 70-ءى بار. 30 مىڭ، 20 مىڭ جوق ەكەن. شەتەلدەن تاپسىرىس بەرىپ تىكتىرتتىك. جان-جاقتان تىكتىرتتىك. الماتىدان دا، تۇركيادان دا، قىتايدان دا تىكتىرتتىك. كەشە الىپ كەلدىك. زورعا ۇلگەردىك. 20 مىڭ تۋ تاراتتىق. جولىمەن 50-60 مىڭ دوللار كەتكەن شىعار. قازاقستاننىڭ ستاديونى ادەمى بولسىن دەگەن ارمانىم بولدى", – دەيدى نۇرلان قويانباەۆ.
ۇقساس جاڭالىقتار
