"ادىرناعا" العىس
دوستارىم، كەشە م.ماقاتاەۆ اتىنداعى №140 مەكتەپ وقۋشىلارى جانە ۇستازدارى،سوسىن،باسقا دا وقىرماندارمەن كەزدەسۋگە باردىم. كەزدەسۋگە مۇرىندىق بولىپ جۇرگەن "ادىرنا" - ۇلتتىق -ەتوگرافيالىق بىرلەستىگىندەگى ارمان، بەيبىت ىنىلەرىم. بىرىنشىدەن، بۇل اقىن مەن وقىرمان كەزدەسۋى، وزىمە تىم توسىن بولدى. توسىندىعى، كەزدەسۋدىڭ ءوتۋ فورماسى مەن مازمۇن-ءمانىنىڭ وزگەشىلىگى. ياعني، مەنىڭ كەزدەسۋ وتكىزۋدەگى ۇستانىمىم، باعىت-باعدارىمداعى اقىن مەن وقىرمان اراسىندا اسابا دا، جۇرگىزۋشى دە بولماي،تاعى دا باسقا راسىمدەر ارالاسپاي، وقىرمان مەن اقىننىڭ وي ءبولىسىپ، پىكىر الىسۋى، سىرلاسۋى بۇزىلىپ، جاڭا فورماتتا ءوتتى. بۇل كەزدەسۋ وقىرمانمەن بىرگە، ءوزىمنىڭ وزىممەن كەزدەسۋىم بولدى. قويىلىم، مەنىڭ ولەڭدەرىمنىڭ بارلىعىنا جۋىعىن قامتىعان. ءار ءبولىم،ياعني، ءتورت ءبولىمنىڭ اراسىندا ءار جىلدارداعى تەلەارنالارعا تۇسكەندەگى ايتقان ويلار مەن پىكىرلەرىممەن قورىتىلىپ، ولار قويىلىمنىڭ بولىمنەن بولىمگە كوشۋىنە تاماشا جەلى بولعان. و دا قويۋشى رەجيسسەر تاپقىرلىعى. كەيبىر ولەڭدەرىمنىڭ ساحنالىق كورىنىسىن كورىپ، ءسوزىن ەسىتىپ كوزىمە جاس كەلدى. مىسالى، "اق قايىڭ" باللادام مەن "اۋرۋ تسىگان" تۋرالى جانە "اقىن مەن مولدا", "مەشىتتەگى قىز" سەكىلدى تراگەديالىق ولەڭدەرىمدى تىڭداپ، مەكتەپ وقۋشىلارى - اكتەرلاردىڭ بەرىلە، جان-تانىمەن ويناعانىن كورىپ، تولقىپ وتىردىم. ناعىز كانىگى اكتەرلار سەكىلدى. شىنايى. جاساندىلىق جوق. كوزىمە جاس كەلدى دە. قولىمدى، كەۋدەمە قويىپ، شىنىمدى ايتايىن، قويىلىم بارىسىندا، اقىن امانحاننىڭ رولىندە ويناعان وقۋشى اكتەردەن ءوزىمدى كورىپ، "وسى مەن ومىردەن ءوتىپ كەتكەن جوقپىن با، وسى؟" دەگەن وي دا قىلاڭ ۇردى.
ماعان قوناق-اقىن رەتىندە سوڭىنان عانا ءسوز بەردى. تولقي سويلەدىم. ويتكەنى، قويىلىمنان العان اسەر تىم كۇشتى ەدى. كەشتە وقىلماعان جاڭا تۋىندىم "رەكۆيەم(جان ازاسى..)" وقىدىم. و باستا ءدىني ۇعىم تۇسىنىكتەن ورگەن "رەكۆيەم" جانرىنداعى قۋاندىق شاڭعىتباەۆ، م. ماقاتاەۆ جانە ورىس اقىنى اننا احماتوۆا شىعارمالارىنىڭ كەي تۇستاعى فورمالىق-مازمۇندىق ۇندەستىگى، جالپى رەكۆيەم جانرىنىڭ قايدان، قالاي وربىگەنى، ونىڭ ونەرگە كەلۋ جولى تۋرالى وتكەن-كەتكەننەن ازداپ سىر شەرتىم. ەكىنشىدەن، بۇل فورماتتىڭ ماعان ۇناعانى، كوڭىلىمە قونعانى، ونىڭ ءتورت بولىمنەن تۇراتىن "اي نۇرى الاقانىمدا" اتتى قويىلىم رەتىندە ءوتۋى. قويىلىمدا وقىلعان ولەڭدەردىڭ تاقىرىبى، مازمۇن-ءمانى، ماعاناسىنا وراي جاسالعان كورىنىستەر، ىشكى-سىرتقى بەزەندىرۋلەر ەرەكشە نازار اۋداردى. وقىلعان ولەڭدەردىڭ ءبىر بىرىمەن لوگيكالىق بايلانىسى بالتالاساڭ بۇزىلماستاي تارتىلعان. اسەرلى. قويىلىمداعى ولەڭدەردى تىڭداپ، ءارى ساحنالىق كورىنىستەردى كورىپ ءوزىمنىڭ ءومىربايانىم كوز الدىمنان ءوتىپ جاتتى. مەنىڭ ءسوز باسىنداعى "وقىرمانمەن ءارى ءوزىمنىڭ وزىممەن كەزدەسۋىم بولدى" دەۋىمنىڭ سىرى سوندا. ال، اقىننىڭ رولىندە ويناعان 9 سىنىپ وقۋشى، ءوزىمدى كوز الدىما كەلتىردى. قويىلىمدا ويناعان وقۋشىلار ماعان كانىگى اكتەرلارداي اسەر بەردى. ياعني، بۇل قويىلىم جاستار تەاترى ارتيستەرىنىڭ كەزەكتى قويعان سپەكتاكلىندەي بولدى. قويىلىمنىڭ سوڭىنداعى قويۋشى رەجيسسەردىڭ شەشىمى دە كەرەمەت. قويىلىم، مەنىڭ ولەڭىمدى وقۋ ارقىلى، مۇقاعالي ولەڭىمەن تۇيىندەلەدى. ونىڭ ءبارى دە كەرەمەت كورىنىسپەن جەتكىزىلگەن. اكتەرلاردىڭ كيگەن كيىمدەرى دە سونداي جاراسىمدى، جاقسى، ءارى ءارتۇرلى. قىسقاسى، تاماشا قويىلىم بولدى. ۇلكەن ساقىناعا سۇرانىپ-اق تۇر. قويىلىم جالىقتىرمايدى. ەگەر، كاسىبي قويۋشى رەجيسسەر تابىلسا دايىن دۇنيە. قويىلىمدا ءان دە، بي دە، ىشكى-سىرتقى مونولوگ تا كەڭ ورىن العان. ديالوگ جاقسى قۇرىلعان. اسىرەسە، و "ديالوگ" دەگەن ولەڭىمدى وقىعاندا، ءتىپتى، مازمۇن - ءمانى ارتىپ كەتكەن.
مىنە، مەنىڭ ولەڭدەرىمنەن تۇتاس ءبىر جۇيەلى، مازمۇن-ءماندى، سپەكتاكەلگە پارا - پار قويىلىم قويىپ، كەزدەسۋ جاساعان مەكتەپ وقۋشىلارى مەن ۇستازدارىنا، سىرتتان كەلگەن وقىرماندارعا، مەكتەپتىڭ باسشىسى ءسانيا وسكەنبايقىزىنا جانە "ادىرنا" بىرلەستىگىندەگى جىگىتتەرگە ۇلكەن راحمەت! امان بولىڭىزدار. بۇگىنگى مەرەكەلەرىڭىزبەن قۇتتىقتايمىن! ءتامات ءتامام!
