«ءمۇفتيات بۇل ماسەلەنى ءوز قۇزىرەتى، ءدىن مەن ءداستۇر ساباقتاستىعى اياسىندا شەشۋدىڭ وڭتايلى جولىن ۇسىندى. ناقتى ايتقاندا، ءتيىستى مەكەمەگە ورامالدىڭ اق جانە كوك ءتۇسى ۇسىنىلدى. وسىعان قاتىستى ءالى دە وڭ شەشىم قابىلدانار دەگەن ۇمىتتەمىز. اللا الاۋىزدىقتان ساقتاسىن»، - دەيدى اعابەك قوناربايۇلى.ەسكە سالا كەتەيىك، مادەنيەت جانە اقپارات ءمينيسترى ايدا بالاەۆا مەكتەپكە حيدجابپەن ەمەس، ارنايى بەكىتىلگەن فورما كيۋدىڭ مىندەتتى ەكەنىن ناقتىلاپ ايتقان ەدى. مينيستر:
“قازىر الەۋمەتتىك جەلىدە مەكتەپتەردە حيدجاب كيۋ ماسەلەسىنە قاتىستى تالقى توقتار ەمەس. وسىعان بايلانىستى، ءدىني سالاعا جاۋاپتى لاۋازىمدى تۇلعا رەتىندە، ءوز تاراپىمنان تۇسىنىكتەمە بەرۋدى ءجون كورىپ وتىرمىن.
اتازاڭىمىزعا سايكەس قازاقستاندا ءدىن مەملەكەتتەن بولىنگەن. ءسوز جوق، مەملەكەت ءدىن بوستاندىعىنا كەپىلدىك بەرەدى. بىراق ءبىز - زايىرلى ەلمىز! سول ءۇشىن دە مەملەكەتتىك ساياساتتىڭ بارلىق ماسەلەلەرى ءدىني پاتۋالارمەن ەمەس، ازاماتتىق نورمالارمەن رەتتەلەدى. قۇقىقتىق-ءنورماتيۆتى اكتىلەر ءاربىر وقۋشىعا مەكتەپ قابىرعاسىندا ارنايى بەكىتىلگەن فورما كيۋدى مىندەتتەيدى. ويتكەنى، ءبىلىم بەرۋ ەرەكشەلىگى بىرىڭعايلىقتى تالاپ ەتەدى.
ال كونستيتۋتسيامىز بويىنشا مەكتەپتىڭ مىندەتى – ەل ازاماتتارىنا ساپالى ءبىلىم بەرۋگە كەپىلدىك بەرۋ جانە ونى قامتاماسىز ەتۋ.
سوندىقتان دا، مەكتەپتە بالا ەڭ الدىمەن ساپالى ءبىلىم الۋى كەرەك. سودان كەيىن بارىپ، ەرجەتە كەلە ءدىني نانىم-سەنىمىن، قانداي كيىم ۇلگىسىن كيەتىنىن ءوزى شەشەدى دەپ ويلايمىن”، دەپ جازعان ەدى.
"ادىرنا" ۇلتتىق پورتالى
