اقتوبەدە الاياقتار 10 جاسار قىزدى قۇرىققا ءتۇسىردى، دەپ حابارلايدى "ادىرنا"ۇلتتىق پورتالى.
بەلگىسىز ايەل ءۇي تەلەفونىنا قوڭىراۋ شالىپ، كىشكەنە بۇلدىرشىنگە جان تۇرشىگەرلىك وقيعانى بايانداعان. "وتىرىكتى شىنداي، اقساقتى تىڭداي" ايتقان الاياق قىزعا اناسىنىڭ جول-كولىك وقيعاسىن جاساعانىن، اقىرىندا جاياۋ جۇرگىنشىنى قاعىپ كەتكەنىن جەتكىزگەن. اناسىن جاۋاپكەرشىلىكتەن قۇتقارۋ ءۇشىن كوپ اقشا قاجەت ەكەنىن ايتقان.
ءوزىن تەرگەۋشى رەتىندە تانىستىرعان ايەل، ءتىپتى، تەلەفوندى قىزدىڭ اناسىنا بەرگەندەي كەيىپ تانىتقان.
"اناسى" جىلاعان داۋىسپەن بالادان ۇيدەگى بارلىق جيناق اقشانى بەرىپ جىبەرۋدى وتىنگەن. بۇدان ءارى الاياق 10 جاسار قىزعا 700 مىڭ تەڭگە كولەمىندەگى اقشا سالىنعان پاكەتتى ءوزىنىڭ سىبايلاسىنا قالاي بەرۋ كەرەكتىگىن ايتقان.
اناسىنىڭ قيىندىققا تاپ بولعانىنا سەنىپ، شوشىپ قالعان بالا اقشانى ولار ايتقان نۇسقاۋ بويىنشا بەرىپ جىبەرگەن. اناسى ۇيگە كەلگەننەن كەيىن عانا بالانىڭ الاياقتارعا الدانعانى بەلگىلى بولعان.
پوليتسيا قىزمەتكەرلەرى جەدەل-ىزدەستىرۋ ءىس-شارالارى بارىسىندا 23 جاستاعى كۇدىكتىنى ۇستادى.
جالعان سويلەگەن تۇرعىن ءوز كىناسىن مويىندادى. ءوزى الەۋمەتتىك جەلى ارقىلى بەلگىسىز اداممەن كەزدەسكەنىن ايتتى. كەزدەسكەن ادامى جالعان سويلەگەن كۇدىكتىگە قىزمەت ۇسىنعان. قىزمەتكە تۇرۋ ءۇشىن جابىرلەنۋشىدەن اقشا الىپ، بارلىق سومانى كورسەتىلگەن "جۇمىس بەرۋشىنىڭ" شوتىنا اۋدارۋدى كوزدەگەن.
وسى فاكتى بويىنشا قر قك-ءنىڭ 190-بابى 1-بولىگى (الاياقتىق) بويىنشا سوتقا دەيىنگى تەرگەۋ باستالدى.
ورايى كەلگەندە ايتا كەتەيىك، وڭىردە الاياقتىقتىڭ قۇربانى بولىپ، پوليتسياعا جۇگىنگەندەر سانى ارتىپ بارادى.
الاياقتار جابىرلەنۋشىلەرگە تۋىستارى اپاتقا ۇشىراعانىن ايتىپ قوڭىراۋ شالىپ، زارداپ شەگۋشىلەردى ەمدەۋ نەمەسە قىلمىستىق ءىستى توقتاتۋ ءۇشىن قاجەت دەگەن سىلتاۋمەن اقشا تالاپ ەتەدى. پوليتسيا قىزمەتكەرلەرى مۇنداي قوڭىراۋلارعا سەنبەس بۇرىن، انىق-قانىعىنا كوز جەتكىزۋ كەرەك ەكەنىن ەسكە سالادى.
ۇقساس جاڭالىقتار
"ادىرنا" ۇلتتىق پورتالى
