بۇگىن ءماجىلىس وتىرىسىنا كەلگەن باس پروكۋروردىڭ ورىنباسارى اسەت شىنداليەۆكە سامات ابىشكە قاتىستى سۇراق قويىلدى، - دەپ حابارلايدى "ادىرنا" ۇلتتىق پورتالى.
اسەت قازاقبايۇلىنىڭ ايتۋىنشا، سامات ءابىشتىڭ قىلمىستىق ىسىنە بايلانىستى قازىر تەرگەۋ جۇمىستارى ءجۇرىپ جاتىر.
«قىلمىستىق پروتسەستىك كودەكستىڭ تالابىنا سايكەس، تەرگەۋ دەرەكتەرىن جاريالانۋعا بولمايدى. سول ءۇشىن قازىرگى تاڭدا بەرەتىن اقپارات وسى. ويتكەنى بۇعان بايلانىستى باس پروكۋراتۋرا اقپارات بەردى. سامات ءابىش سىرتقا شىقپاۋ تۋرالى قولحاتپەن ەلدە ءجۇر. ەلدەن كەتپەۋ تۋرالى قولحات جازعان ادامنىڭ ءۇيىنىڭ الدىندا ارنايى قاراۋىل قويىلمايدى.
تەرگەۋشى شاقىرعان كەزدە ۇيىنەن كەلەدى. ءوزى قورعاۋشىلار مەن جانە باسقا دا تۇلعالارمەن كەزدەسە الادى. ال ارنايى قاراۋىل ۇيقاماققا الىنعان كەزدە قويىلادى. ال قۇقىقتىق ستاتۋسىنا قاتىستى ەشقانداي اقپاراتىم جوق" دەدى ول.
ەكس-پرەزيدەنت نۇرسۇلتان نازارباەۆتىڭ نەمەرە ءىنىسى سامات ءابىش قاڭتار كوتەرىلىسىنەن كەيىن ۇلتتىق قاۋىپسىزدىك كوميتەتىنىڭ ءبىرىنشى ورىنباسارى قىزمەتىنەن كەتكەن بولاتىن. اتالعان كوميتەتتى باسقارعان كارىم ءماسىموۆ پەن ونىڭ بىرنەشە ورىنباسارى تۇرمەگە قامالعان كەزدە، سامات ساتىبالدىۇلىنا قاتىستى ەشقانداي ءىس قوزعالعان جوق.
سامات ءابىش قورعاۋشى جانە باسقا دا تۇلعالارمەن كەزدەسە الادى – باس پروكۋراتۋرا
27.09.2023
2455
