الماتى وبلىسىندا جول اپاتىنان توعىز ادام قازا تاپتى دەپ حابارلادى الماتى وبلىستىق پوليتسيا دەپارتامەنتىنىڭ ءباسپاسوز قىزمەتى. پوليتسيا اقپاراتى بويىنشا، وقيعا 12 مامىر كۇنى تاڭەرتەڭ الماتى-بىشكەك تراسساسىنىڭ 109-شى شاقىرىمىندا بولعان.
"جول اپاتىنان 9 ادام قازا تاپتى، ولاردىڭ ۇشەۋى - ايەل" دەلىنگەن دۇيسەنبى، 13 مامىردا تاراتىلعان پوليتسيا حابارلاماسىندا.
پوليتسەيلەر قازا تاپقانداردىڭ اتى-جوندەرى بەلگىلى بولعانىن ايتتى.
"قازا تاپقاندار الماتى، شىمكەنت قالاسى جانە تۇركىستان، الماتى وبلىسىنىڭ تۇرعىندارى. الدىن الا بولجام بويىنشا، Lada جۇرگىزۋشىسى كولىكتى باسقارا الماي، جولدىڭ قاراما-قارسى بولىگىنە ءوتىپ كەتىپ، Toyota Camry كولىگىنىڭ ماڭدايشا تەرەزەسىنە سوعىلعان. قازىر بۇل فاكتى بويىنشا قاجەتتى ساراپتاما تاعايىندالىپ، قىلمىستىق كودەكستىڭ 345-باپ، 4-بولىگى ("كولiك قۇرالدارىن باسقاراتىن ادامداردىڭ جول ەرەجەسى نەمەسە كولiك قۇرالدارىن پايدالانۋ قاعيدالارىن بۇزۋى”) بويىنشا سوتقا دەيىنگى تەرگەۋ باستالدى" دەلىنگەن حابارلامادا.
ءساۋىر ايىنىڭ سوڭىندا قوردايدا ىرى جول اپاتى بولىپ، 11 ادام قازا تاپتى، 29 ادام زارداپ شەكتى.
