پرەزيدەنت قاسىم-جومارت توقاەۆتىڭ رەسەي فەدەراتسياسىنا جۇمىس ساپارى اياسىندا «ورتا ازيا – ورتالىق» ماگيسترالدى گاز قۇبىرىمەن رەسەيدىڭ تابيعي گازىن قازاقستان اۋماعى ارقىلى وزبەكستانعا تاسىمالداۋ جوباسىن ىسكە قوسۋ ءراسىمى ءوتتى، دەپ حابارلايدى «ادىرنا» ۇلتتىق پورتالى Ulysmedia.kz سايتىنا سىلتەمە جاساپ.
سالتاناتتى شاراعا مەملەكەت باسشىسىمەن قاتار رەسەي پرەزيدەنتى ۆلاديمير پۋتين جانە وزبەكستان پرەزيدەنتى شاۆكات ميرزيوەۆ قاتىستى.
قاسىم-جومارت توقاەۆ ءوز سوزىندە بۇل تاريحي وقيعا قازاقستان، رەسەي جانە وزبەكستاننىڭ ەنەرگەتيكا سالاسىنداعى ستراتەگيالىق ىنتىماقتاستىعىن مۇلدە جاڭا دەڭگەيگە كوتەرەتىنىن جانە ەلدەر اراسىنداعى تاتۋ كورشىلىك قاتىناستار جىلناماسىنىڭ تاعى ءبىر جارقىن بەتىن اشاتىنىن اتاپ ءوتتى.
– گاز سالاسى مەملەكەتتەرىمىزدىڭ تۇراقتى الەۋمەتتىك-ەكونوميكالىق دامۋىندا زور ءرول اتقارادى دەۋگە بولادى. سوندىقتان بۇل جوبا بارلىق قاتىسۋشى تاراپتىڭ مۇددەسىنە ساي كەلەدى. قازاقستان ءوز اۋماعىندا ماگيسترالدى گاز قۇبىرىن دايىنداۋدى ۋاقتىلى جانە تولىق اياقتادى. جوبا رەسەي گازىنىڭ ەكسپورتقا شىعۋ باعىتتارىن ءارتاراپتاندىرىپ، قازاقستاننىڭ گاز تاسىمالداۋ ينفراقۇرىلىمىن كەڭەيتۋگە جانە جاڭعىرتۋعا سەپتىگىن تيگىزەدى. سونداي-اق وزبەكستاننىڭ جىلىنا 3 ميلليارد تەكشە مەترگە دەيىن جەتەتىن جانە جىلدان-جىلعا ارتىپ كەلە جاتقان تابيعي گازعا دەگەن قاجەتتىلىگىن وتەۋگە مۇمكىندىك بەرەدى. سونىمەن قاتار ول ەلدەرىمىزدىڭ ونەركاسىبىن دامىتۋعا، بيزنەس-احۋالدى جاقسارتۋعا، ازاماتتاردىڭ تۇرمىس دەڭگەيىن ارتتىرۋعا تىڭ سەرپىن بەرەدى، – دەدى قازاقستان پرەزيدەنتى.
مەملەكەت باسشىسىنىڭ پىكىرىنشە، جوبا ورتالىق ازيا ايماعىنداعى تۇراقتىلىق پەن ەنەرگەتيكالىق قاۋىپسىزدىكتى نىعايتۋ ىسىندە ەلەۋلى ءرول اتقارادى
– جىلىنا 255 ميلليارد تەكشە مەترگە دەيىن گاز تاسىمالداي الاتىن ماگيسترالدى گاز قۇبىرىنىڭ 20 مىڭ شاقىرىمنان استام بولىگى ەلىمىزدىڭ اۋماعى ارقىلى وتەدى. قازاقستان ءوزىنىڭ ترانزيتتىك الەۋەتىن تولىق پايدالانۋعا مۇددەلى جانە رەسەي گازىن تاسىمالداۋ كولەمىن ودان ءارى ۇلعايتۋعا دايىن، – دەدى پرەزيدەنت.
قاسىم-جومارت توقاەۆ ءسوزىنىڭ سوڭىندا ماڭىزدى ترانسۇلتتىق جوبانى ىلگەرىلەتۋگە قوسقان جەكە ۇلەسى ءۇشىن ۆلاديمير پۋتينگە، سونداي-اق جان-جاقتى قولداۋ كورسەتكەن شاۆكات ميرزيوەۆكە ريزاشىلىعىن ءبىلدىردى.
مەملەكەت باسشىسى قازاقستان، رەسەي جانە وزبەكستاننىڭ گاز سالاسىنداعى ماماندارىنىڭ بىرلەسكەن جۇمىستى كاسىبي دەڭگەيدە ءارى اسا زور جاۋاپكەرشىلىكپەن اتقارعانىن اتاپ ءوتتى.
سونىمەن قاتار شارادا ۆلاديمير پۋتين مەن شاۆكات ميرزيوەۆ ءسوز سويلەدى.
