مەملەكەت باسشىسى قاسىم-جومارت توقاەۆتىڭ قىزىلوردا وبلىسىنا ساپارى سىرداريا اۋدانى ناعي ءىلياسوۆ اۋىلىنىڭ تىنىس-تىرشىلىگىمەن تانىسۋدان باستالدى، دەپ حابارلايدى «ادىرنا» ۇلتتىق پورتالى اقوردانىڭ رەسمي سايتىنا سىلتەمە جاساپ.
قازاقستاننىڭ ەڭبەك ەرى، «ابزال جانە ك» تولىق سەرىكتەستىگىنىڭ نەگىزىن قالاۋشى ابزال ەراليەۆ پرەزيدەنتكە كاسىپورىننىڭ تابىستى قىزمەت ەتىپ، ءوڭىر بويىنشا اۋىل شارۋاشىلىعى سالاسىنداعى جەتەكشى مەكەمەگە اينالعانىن جەتكىزدى. سونىمەن قاتار ءونىمدى ەڭبەكتىڭ ارقاسىندا تۋعان ولكەنىڭ دامۋىنا تۇراقتى قولداۋ كورسەتىپ كەلە جاتقانىن ايتتى.
پرەزيدەنت «ابزال جانە ك» شارۋاشىلىعىنىڭ دەمەۋشىلىگىمەن سالىنعان اۋىلدىڭ ورتالىق الاڭىن، سپورت كەشەنىن ارالاپ كوردى. سپورت كەشەنىندە جەرگىلىكتى حالىق فۋتبول، ۆولەيبول، ۇستەل تەننيسى جانە كۇرەس تۇرلەرىمەن ەمىن-ەركىن شۇعىلدانا الادى. مەملەكەت باسشىسى سپورت كەشەنىندە جەتكىنشەكتەرمەن اڭگىمەلەستى.
– سپورتپەن شۇعىلدانۋ كەرەك. اسىرەسە، وزدەرىڭىز سياقتى جاستارىمىزدىڭ دەنى ساۋ، مىقتى ازامات بولىپ ءوسۋى قاجەت. سەبەبى قازاقستاننىڭ بولاشاعى – سىزدەردىڭ قولدارىڭىزدا. جاستاردىڭ دەنى ساۋ بولسا، مەملەكەت تە قۋاتتى بولادى. سىر ەلىنەن مىقتى سپورتشىلار شىققان. ءالى دە كوپتەگەن چەمپيوندار شىعادى دەپ سەنەمىن، – دەدى قاسىم-جومارت توقاەۆ.
«ادىرنا» ۇلتتىق پورتالى
