قازاقستان بيلىگى اكتيۆتەردى قايتارۋ تۋرالى اقپاراتقا قول جەتكىزۋدى شەكتەدى، دەپ حابارلايدى «ادىرنا» ۇلتتىق پورتالى.
«قازاقستان رەسپۋبليكاسى پرەمەر-ءمينيسترى ءاليحان سمايىلوۆتىڭ توراعالىعىمەن زاڭسىز يەمدەنىلگەن اكتيۆتەردى مەملەكەتكە قايتارۋ ماسەلەلەرى جونىندەگى كوميسسيانىڭ كەزەكتى وتىرىسى ءوتتى. قورىتىندىسى بويىنشا «زاڭسىز يەمدەنىلگەن اكتيۆتەردى مەملەكەتكە قايتارۋ تۋرالى» زاڭىمەن بەلگىلەنگەن ولشەمشارتتارىنا سايكەس كەلەتىن بىرقاتار وليگوپوليا سۋبەكتىلەرىن تىزىلىمگە ەنگىزۋ تۋرالى شەشىم قابىلداندى.ينۆەستيتسيالىق، بەدەلدى، الەۋمەتتىك-ەكونوميكالىق تاۋەكەلدەر مەن فاكتورلاردى ەسكەرە وتىرىپ، ءتىزىلىمنىڭ مازمۇنىن كوميسسيا تارالۋى شەكتەۋلى اقپاراتقا جاتقىزدى»، - دەپ جۇما كۇنى باس پروكۋراتۋرانىڭ ءباسپاسوز قىزمەتى حابارلادى.
باس پروكۋراتۋرانىڭ اكتيۆتەرىن قايتارۋ جونىندەگى كوميتەتىنە سۋبەكتىلەردى ولاردىڭ تىزىلىمگە ەنگىزىلگەنى تۋرالى حاباردار ەتۋ جونىندە شارالار قابىلداۋ كورسەتىلگەن.
«تىزىلىمگە ەنگىزىلگەن تۇلعالار وزدەرىنە تيەسىلى اكتيۆتەردى يەلىكتەن شىعارۋ، اۋىرتپالىق سالۋ نەمەسە سەنىمگەرلىك باسقارۋعا بەرۋ تۋرالى كوميتەتتى الدىن الا حاباردار ەتۋگە مىندەتتى. كوميتەت اكتيۆتەردى زاڭسىز شىعارۋ سحەمالارىنا تارتىلعان تۇلعالاردى، ولاردىڭ ورنالاسقان جەرىن، قۇنىن، سونداي-اق ساتىپ الۋ بەلگىلەرى مەن كوزدەرىن انىقتاۋ ماقساتىندا اقپاراتتى مونيتورينگىلەۋ جانە تالداۋ بويىنشا جۇمىستى جالعاستىرۋدا»، - دەپ تولىقتىردى ۆەدومستۆو.
«ادىرنا» ۇلتتىق پورتالى
