قازاقستاندىق كاسىپقوي بوكسشى جانىبەك ءالىمحانۇلى قارسىلاسىن نوكاۋتپەن جەڭدى، دەپ حابارلايدى "ادىرنا" ءتىلشىسى قازاقپارات اگەنتتىگىنە سىلتەمە جاساپ.
وتانداسىمىز IBF نۇسقاسى بويىنشا الەم چەمپيونى اتانعان ۆينچەنتسو گۋالتەريمەن تارتىستى باسەكەدە قارسىلاسىن نوكاۋتقا جىبەردى.
روزەنبەرگ قالاسىندا وتكەن بىلعارى قولعاپ سايىسىندا 30 جاستاعى جانىبەك ءالىمحانۇلى العاشقى راۋندتاردا باسىمدىق تانىتىپ، قارسىلاسىن سوققىلارىمەن ەسەڭگىرەتكەن. 12 راۋندقا جوسپارلانعان كەزدەسۋ 6-راۋندا اياقتالدى. سەبەبى گۋالتەري قازاقستاندىق سپورتشىعا قارسىلىق تانىتا المادى، سوندىقتان تورەشى جەكپە-جەكتى توقتاتىپ تاستادى.
مەملەكەت باسشىسى سپورتشىنى جەڭىسىمەن قۇتتىقتاپ، قازاق بوكس مەكتەبىنىڭ جوعارى دەڭگەيدە ەكەنىن اتاپ ءوتتى.
"جانىبەك ءالىمحانۇلىن WBO جانە IBF تۇجىرىمدارىنان الەم چەمپيونى اتاعى ءۇشىن وتكەن جەكپە-جەكتەگى جارقىن جەڭىسىمەن قۇتتىقتايمىن. جانىبەك قازاق بوكس مەكتەبىنىڭ جوعارى دەڭگەيى مەن مىقتىلىعىن الەمگە تاعى دا پاش ەتتى. بۇل جەڭىس بوكسپەن اينالىساتىن جاستاردى بيىك بەلەستەردى باعىندىرۋعا ىنتالاندىرادى. سىزگە زور دەنساۋلىق، باق-بەرەكە تىلەيمىن. جەڭىستەن جەڭىسكە جەتە بەرىڭىز!", - دەدى پرەزيدەنت قاسىم-جومارت توقاەۆ الەۋمەتتىك جەلىدەگى پاراقشاسىندا.جانىبەك ءالىمحانۇلى گەرمانيالىق سپورتشىمەن ورتا سالماقتا بوكستاسىپ، WBO جانە IBF بەلبەۋلەرىن يەلەندى. بۇل جەرلەسىمىزدىڭ كاسىپقوي بوكستاعى 15-ءشى جەكپە-جەگى بولدى.