شىعىس قازاقستان وبلىسى، التاي اۋدانىنىڭ جاڭا بۇقتىرما اۋىلىنداعى ۇلى وتان سوعىسىنداعى جەڭىستىڭ 75 جىلدىعىنا ارنالعان مونۋمەنت اۋماعىن اباتتاندىرۋ جۇمىسىنا 240 189 133 تەڭگە قارجى ءبولدى، - دەپ حابارلايدى ادىرنا ۇلتتىق پورتالى goszakup.gov.kz سايتىنا سىلتەمە جاساپ.
جاڭا بۇقتىرما — شىعىس قازاقستان وبلىسىنىڭ التاي اۋدانىنا قاراستى كەنت. كەنت دەگەن اتى بولماسا، تۇرعىلىقتى حالىق سانى بەس مىڭعا جەتپەيتىن ەرتىس بويىنداعى شاعىن اۋىل.
سول اۋىلعا وسىدان ءۇش جىل بۇرىن ەكىنشى دۇنيەجۇزىلىك سوعىستىڭ 75 جىلدىعىنا ارنالىپ مونۋمەنت cالىنعان. سول مونۋمەنتتىڭ اۋماعىن اباتتاندىرۋ ءۇشىن 26 قازان كۇنى ەكى تەندەر جاريالانعان.
ءبىرىنشىسى "نوۆايا بۇقتىرما اۋىلىنداعى ۇلى وتان سوعىسىنداعى جەڭىستىڭ 75 جىلدىعىنا ارنالعان مونۋمەنت اۋماعىن اباتتاندىرۋ" وبەكت بويىنشا تەحنيكالىق قاداعالاۋ قىزمەتتەرىن كورسەتۋ" دەپ اتالادى. "شىعىس قازاقستان وبلىسىنىڭ مەملەكەتتىك ساتىپ الۋ باسقارماسى" مەملەكەتتىك مەكەمەسى اتالعان جوباعا 167 718 274.07 تەڭگە بولگەن.
ال، ەكىنشى تەندەر ءدال سول كۇنى "نوۆايا بۇقتىرما اۋىلىنداعى ۇلى وتان سوعىسىنداعى جەڭىستىڭ 75 جىلدىعىنا ارنالعان مونۋمەنت اۋماعىن اباتتاندىرۋ" جوباسىن باسقارۋ بويىنشا ينجينيرينگتىك قىزمەتتەر" دەگەن اتاۋمەن جارىق كوردى. بۇل جۇمىسقا بيۋدجەتتەن 72 470 859.17 تەڭگە بولىنگەن. ياعني، ەكى اتاۋمەن جاريالانعان ءبىر جۇمىسقا جالپى سوماسى 240 189 133 تەڭگە جۇمسالادى دەگەن ءسوز.
اتالعان ەكى مەملەكەتتىك ساتىپ الۋدىڭ جەڭىمپازى 10 قاراشا كۇنى انىقتالادى.
جاڭا بۇقتىرما اۋىلى ءۇلبى جوتاسىنىڭ ەتەگىندە، ەرتىس وزەنىنىڭ جاعاسىندا ورنالاسقان، تابيعاتى كەرەمەت مەكەن. جەرگىلىكتى بيلىك ەلدىمەكەن پاركىن كوركەيتۋگە 240 ميلليون تەڭگەدەن استام قارجى ءبولىپ، رەسمي كەنت سانالاتىن اۋىلدى تۋريستىك ورتالىققا اينالدىرۋدى كوزدەپ وتىرعان شىعار.
ولاي بولسا، نە سەبەپتى ۇلى وتان سوعىسىنداعى جەڭىستىڭ 75 جىلدىعىنا ارنالعان مونۋمەنت اۋماعىن اباتتاندىرۋعا باسىمدىق بەرىلەدى؟
شىعىس قازاقستان وبلىسىنىڭ شەندىلەرى ءدال رەسەي بيلىگى سەكىلدى مەملەكەتتىڭ بار يدەولوگياسىن ەكىنشى دۇنيەجۇزىلىك سوعىستاعى جەڭىسكە بايلاپ، حالىقتى رۋحتاندىرماق پا؟
ءبىزدى وسى سۇراق مازالايدى. ءسىز نە دەيسىز؟
قانات بىرلىكۇلى،
“ادىرنا” ۇلتتىق پورتالى
