تۋعان قالام - قاراعاندى شاحتاسىنداعى قايعىلى وقيعا تۋرالى ەستىپ، بۇكىل قازاقستاندىقتارمەن بىرگە قابىرعام قايىسۋدا. «تاس تۇسكەن جەرىنە اۋىر» دەيدى قازاق. قازا تاپقان كەنشىلەردىڭ وتباستارىنا قر قارۋلى كۇشتەرىنىڭ ارداگەرلەرى اتىنان، جەكە ءوز اتىمنان كوڭىل ايتىپ، قايعىلارىڭىزعا ورتاقپىز دەگىم كەلەدى.
قيىندىعى مول، قاۋىپ-قاتەرگە تولى شاحتەر ەڭبەگىنىڭ باعاسىن ءوز باسىم جاقسى بىلەمىن. ويتكەنى سول كوستەنكو اتىنداعى شاحتادا بەس جىل بويى پروحودچيك بولىپ ەڭبەك ەتتىم. وسى جاعدايدى جۇرەگىمە جاقىن قابىلداعانىم دا سوندىقتان شىعار.
وقيعا ورنىنا مەملەكەت باسشىسى ق.توقاەۆ بارىپ حالىقپەن كەزدەستى، ششۇعىل شەشىمدەر قابىلداۋعا نۇسقاۋلار بەردى. سونداي-اق، پرەزيدەنت ەشكىمنىڭ مەملەكەت قامقورلىعىنان تىس قالمايتىنىن نىقتاپ ايتتى. «ارسەلور ميتتال تەمىرتاۋ» كومپانياسىمەن ينۆەستيتسيالىق ىنتىماقتاستىق توقتاتىلاتىن بولدى. ەندى قاراپايىم حالىقتىڭ جاعدايىن جاسايتىن جاڭا ينۆەستور كەلەدى دەپ ۇمىتتەنەيىك.
بۇگىن قازاقستاندا قارالى كۇن، 29 قازان – ۇلتتىق ازا تۇتۋ كۇنى دەپ جاريالاندى. «قايعىنى بولىسسە ازايادى» دەيدى حالىق دانالىعى، ەندەشە جۇدىرىقتاي جۇمىلىپ، ەلدىگىمىزدى تانىتساق بۇل قيىندىقتى دا ەڭسەرەتىنىمىز انىق.
مۇحتار التىنباەۆ،
«قر قارۋلى كۇشتەرى ارداگەرلەرى» رقب توراعاسى،
ارميا گەنەرالى، حالىق قاھارمانى
ۇقساس جاڭالىقتار
