31 قازاندا قر پرەمەر-ءمينيسترى ءاليحان سمايلوۆتىڭ توراعالىعىمەن وتكەن ۇكىمەت وتىرىسىندا توتەنشە جاعدايلار ءمينيسترى سىرىم ءشارىپحانوۆ كوستەنكو اتىنداعى شاحتاداعى جاعداي تۋرالى باياندادى، دەپ حابارلايدى «ادىرنا» ۇلتتىق پورتالى.
بۇگىنگى كۇنى ىزدەستىرۋ-قۇتقارۋ جۇمىستارى بارىسىندا 45 كەنشىنىڭ دەنەسى جانە الدىن-الا بولجام بويىنشا 46-شى قازا تاپقان ادامنىڭ دەنە بولشەكتەرى تابىلدى. قايتىس بولعان 40 ادامنىڭ جەكە باسى انىقتالدى، 6-ى انىقتالمادى. ولاردى سايكەستەندىرۋ ءۇشىن ءتيىستى ساراپتامالار جۇرگىزىلەدى. ىزدەۋ جۇمىستارى ەلەكتر ەنەرگياسىنىڭ بولماۋىمەن، تاۋ-كەن قازبالارىنىڭ ۇزىندىعىمەن، كوپتەگەن بۇزىلعان مەحانيزمدەردىڭ بولۋىمەن قيىندادى. سۋ باسقان جەكەلەگەن تاۋ-كەن قازبالارىندا جۇمىس جاساۋ قيىنعا ءتۇستى. قازىرگى ۋاقىتتا اشىق جانۋ وشاقتارى جوق، گاز جاعدايى قالىپتى. شاحتانىڭ قىزمەتىن قالپىنا كەلتىرۋ ءۇشىن تاۋ-كەن قازبالارىن زەرتتەۋ جانە جەكەلەگەن ۋچاسكەلەردە سۋ سورۋ جۇمىستارى جۇرگىزىلۋدە.«اۆاريانىڭ سەبەپتەرىن تەرگەپ-تەكسەرۋ شەڭبەرىندە ۇكىمەتتىك كوميسسيا مۇشەلەرىمەن بىرگە شاحتاعا ءتۇستىم. ءبىز وتە ماڭىزدى بۇزىلۋلاردى انىقتادىق. تاۋ-كەن قازبالارىندا شاحتا جابدىقتارى جىلجىپ كەتكەن. 15-تەن استام وقشاۋلاعىش بوگەتتەر مەن جەلدەتۋ قۇرىلىستارى قيراعان»، - دەپ اتاپ ءوتتى مينيستر.قازىرگى ۋاقىتتا تاعى 7 شاعىن كوميسسيا قۇرىلىپ، جۇمىس ىستەپ جاتىر. سونىمەن قاتار تەرگەۋگە قازاقستاننان جانە شەتەلدەردەن ساراپتامالىق ۇيىمدار تارتىلدى. ەستەرىڭىزگە سالايىق، 28 قازاندا ساعات 2-دەن 36 مينۋت كەتكەندە «ارسەلورميتتال تەمىرتاۋ» اق كومىر دەپارتامەنتىنىڭ كوستەنكو اتىنداعى شاحتادا تەرەڭدىگى 700 مەتردە جانۋ بولىپ، كەيىننەن مەتان-اۋا قوسپاسىنان جارىلعان بولاتىن.
«ادىرنا» ۇلتتىق پورتالى
