ەلىمىز ەگەمەندىگىن العاندا قوعامداعى ءدىننىڭ ءرولى ايقىندالعان بولاتىن. سان عاسىرلىق مادەنيەتىمىز بەن سالت-ءداستۇرىمىزدى، ۇلتتىق قۇندىلىعىمىزدى يسلام دىنىمەن ساباقتاستىرعان اتا-بابا جولى بويىنشا زايىرلى مەملەكەتەمىزدە ادام قۇندىلىعى مەن بوستاندىعى، ونىڭ ءدىني نانىم-سەنىمىنە ەركىندىك بەرىلگەن.
دەسەدە بۇگىنگى تاڭدا زايىرلى قوعامنىڭ ءوز ماقسات-مۇددەسىنە قايشى ارەكەت جۇرگىزىپ جاتقان جات اعىمداردىڭ كەيبىر ارەكەتتەرى ۇلتىمىزدىڭ قاۋىپسىزدىگىنە قاۋىپ توندىرەتىن ارەكەتتەرگە بارىپ جاتقانى شىندىق.
زايىرلى مەملەكەتتە ءدىننىڭ ورنى قانداي بولۋى كەرەك؟ ءدىن قوعامداعى ادام ساناسىن دۇرىس باعىتتا قالاي قالىپتاستىرىپ، تاربيەلەي الىپ جاتىر؟ زايىرلى قوعامنىڭ شىنايى سيپاتى قانداي بولۋى كەرەك؟ وسى سۇراقتار كوپتىڭ كوكەيىندە جۇرگەنى جاسىرىن ەمەس.
ءدىن – ادامزات بالاسىن ءبىر-بىرىنە مەيىرىممەن قاراپ، تازالىقتى، يماندىلىقتى ناسيحاتتايتىن ۇلكەن قۇرال. قازىرگى قوعامدا شىندىعىنا كەلگەندە ءدىننىڭ اتىن جامىلعاندار ەلدىڭ تىنىشتىعى مەن بىرلىگىنە سىزات ءتۇسىرۋدى كوزدەيتىن پيعىلدارعا كوشتى. بۇل زايىرلى مەملەكەت ءۇشىن اسا قاۋىپتى قۇبىلىس. زايىرلى قوعامنىڭ سيپاتىندا مەملەكەتتىڭ حالقىن ۇيىستىرىپ، ۇلتتىق مۇددەگە جۇمىس جاساۋعا ۇندەيتىن باستى تەتىك – ساۋاتتىلىق پەن ءبىلىم.
ءبىزدىڭ قازىرگى مەملەكەتىمىز ازاماتتاردىڭ ءبىلىم الۋىنا بارىنشا كوڭىل ءبولىپ وتىر. جالپى ورتا ءبىلىم بەرەتىن مەكتەپتەر مەن كوللەدج، ۋنيۆەرسيتەتتەردىڭ ءبىلىم بەرۋدەگى ساپاسىن ارتتىرۋدا ارنايى باعدارلامالار قابىلدانۋدا. الايدا كوپ جاعدايدا كەيبىر اۋىل، اۋدانداردا بىلىم وشاقتارىنىڭ جەتىسپەۋشىلىگى سەزىلەدى. ارنايى كاسىبي باعدارعا باعىتتالعان كوللەدجدەردىڭ، جوعارعى وقۋ ورىندارىنىڭ سانىن دا نەعۇرلىم كوبەيتە تۇسكەن جون. دىني ساۋاتتىلىقتى قالىپتاستىرۋ تەتىگى دەپ تەك مەشىتتەردىڭ سانىن كوبەيتۋگە ءمان بەرۋ قازىرگى كۇنى اسا قاجەتتى بولماۋى مۇمكىن ەكەندىگىن باعامداعان ءجون.
ءححى عاسىر وزىق تەحنولوگيا مەن يننوۆاتسيانى دامىتاتىن ءداۋىر ەكەنىن ەسكەرسەك، تەك ءدىني عيماراتتارمەن سالىستىرعاندا زايىرلى قوعامدا العا قاراي جىلجۋدى ماقسات تۇتاتىن جاستاردى قولدايتىن ءبىلىم وشاقتارىنىڭ كوپ بولعانى قوعام ءۇشىن پايدالى.
زايىرلى مەملەكەتتىڭ وز زاڭى، قادىر تۇتار قۇندىلىقتارى بار. مۇنداعى باستى قۇندىلىق ادام بولسا، ونىڭ سول ەلدە زامانعا ساي ءبىلىم الىپ، دامۋى نەگىزگى قاعيدا بولىپ سانالادى. ءبىز وسىنى ەسكەرۋىمىز قاجەت. ۇلتتىق مۇددەمەن استاسقان جاعدايدا عانا زايىرلى قوعامنىڭ ءوز قاعيداتتارى جۇزەگە اساتىنىن ۇمىتپاعان ابزال.
تاريحتا ءدىني ەكسترەميستىك ۇيىمداردىڭ كەسىرىنەن قانشاما مەملەكەتتىڭ كۇيرەپ، جويىلىپ كەتكەنى بەلگىلى. ءدىن اتىن جامىلعان تەرىس پيعىلدى ميسسيونەرلەر ەلدىڭ اراسىنا ىرىتكى سالىپ، ۇلتتى ىدىراتۋدىڭ ارەكەتتەرىن جوسپارلايدى.
سول ارقىلى ءوزىن زايىرلى دەپ تانىعان ەلدىڭ بەرەكە-بىرلىگىن بۇزادى. بۇل ەكسترەميستىك اعىمداردىڭ ارەكەتى زايىرلى قوعامداعى ءدىننىڭ شىنايى كەلبەتى بولىپ تابىلمايدى. وسىنى قاپەرىمىزدە ۇستانعان ءجون بولار، اعايىن!
