قازاقستان پالەستينا حالقىنا 1 ميلليون دوللار كولەمىندە كومەك بەرەدى. بۇل تۋرالى مەملەكەت باسشىسى قاسىم-جومارت توقاەۆ تۇركى مەملەكەتتەرى ۇيىمىنىڭ 10-سامميتىندە ايتتى، دەپ حابارلايدى «ادىرنا» ءتىلشىسى.
پرەزيدەنت قازىر اينالامىزدا كۇردەلى احۋال قالىپتاسىپ وتىرعانىن اتاپ ءوتتى.
«سولتۇستىكتە رەسەي مەن ۋكراينا، تاياۋ شىعىستا يزرايل مەن پالەستينا اراسىندا قاندى قاقتىعىس بولىپ جاتىر. اۋعانستاننىڭ جاعدايى دا تۇراقسىز. باتىستا زاڭسىز كوشى-قون ماسەلەسى ۋشىعىپ تۇر. بۇگىندە گازا سەكتورىنداعى بەيبىت تۇرعىندار، اسىرەسە، بالالار جانە قارتتار جانجال ازابىن شەگۋدە. ولاردىڭ قاۋىپسىزدىگىن قامتاماسىز ەتۋ – باستى مىندەت. وسى ورايدا، قازاقستاننان پالەستينا حالقىنا 1 ميلليون دوللار كولەمىندە گۋمانيتارلىق كومەك بەرۋ تۋرالى شەشىم قابىلدادىم»،—دەدى ول.
مەملەكەت باسشىسىنىڭ پىكىرىنشە، ونداعان جىل بويى شەشىمىن تاپپاعان وزەكتى ماسەلەلەردى زورلىق-زومبىلىق كورسەتۋ جانە لاڭكەستىك ادىستەر ارقىلى شەشۋ مۇلدەم دۇرىس ەمەس.
«قازاقستان مۇنداي تاسىلدەردى قاتاڭ ايىپتايدى. احۋال ۋشىعىپ كەتسە، ونىڭ سالدارى ءتىپتى اۋىر بولۋى مۇمكىن. بۇل رەتتە كەز-كەلگەن جانجالدى بەيبىت كەلىس-ءسوز جانە ديپلوماتيالىق ديالوگ ارقىلى عانا شەشۋگە شاقىرامىز. ءبىز ءۇشىن ءار ەلدىڭ اۋماقتىق تۇتاستىعىن ساقتاۋ جانە ونىڭ ىشكى ىسىنە قول سۇقپاۋ – باستى باسىمدىق. حالىقارالىق قۇقىق نورمالارىن ساقتاي وتىرىپ، بىرىككەن ۇلتتار ۇيىمى قاۋىپسىزدىك كەڭەسىنىڭ قارارلارىن مۇلتىكسىز ورىنداۋ ماڭىزدى»،—دەپ تولىقتىردى قاسىم-جومارت توقاەۆ.
بۇدان الدىن وزبەكستان پرەزيدەنتى شاۆكات ميرزيوەۆ پالەستينا ەلىن اشىق تۇردە قولدايتىنىن مالىمدەپ، گازا سەكتورىنا گۋمانيتارلىق كومەك رەتىندە 1,5 ملن دوللار قارجى بولۋگە شەشىم قابىلداعانىن جاريالاعان.
