مەملەكەت باسشىسى قاسىم-جومارت توقاەۆ Cىبايلاس جەمقورلىققا قارسى ءىس-قيمىل اگەنتتىگىنىڭ توراعاسى اسحات جۇماعاليدى قابىلدادى. بۇل تۋرالى اقوردا مالىمدەدى، دەپ حابارلايدى “ادىرنا” ۇلتتىق پورتالى.
پرەزيدەنتكە سىبايلاس جەمقورلىققا قارسى قىزمەتتىڭ بيىلعى 10 ايدا اتقارعان جۇمىسىنىڭ ناتيجەلەرى جونىندە باياندالدى.
وسى ۋاقىت ىشىندە ەلىمىزدە جەمقورلىققا قاتىستى 1500-گە جۋىق قىلمىس تىركەلىپ، 1100-دەن استام ادامنىڭ ءىسى اشكەرەلەندى. ونىڭ 158-ءى – ءتۇرلى دەڭگەيدەگى باسشىلار، - دەدى اسحات جۇماعالي.
سونداي-اق، سوتقا مىڭنان استام ءىس جولدانىپ، 282 ميلليارد تەڭگە شىعىن وتەلگەن. ال اگەنتتىك توراعاسى 2022 جىلدان بەرى بيۋدجەتكە جانە كۆازيمەملەكەتتىك سەكتور سۋبەكتىلەرىنە قۇنى شامامەن 857 ميلليارد تەڭگە بولاتىن مۇلىك اكتيۆتەرى مەن قارجى قايتارىلعانىن ايتتى.
بۇدان بولەك، اسحات جۇماعالي مەملەكەت باسشىسىنا جەمقورلىقتىڭ الدىن الۋ جۇمىستارى تۋرالى ەسەپ بەردى.
سىبايلاس جەمقورلىق تاۋەكەلدەرى كارتاسىن جۇزەگە اسىرۋ اياسىندا تاپسىرىلۋ مەرزىمى كەشىكتىرىلگەن، قارجى جىمقىرۋ قاۋپى بار الەۋمەتتىك نىساندار قۇرىلىسىنا مونيتورينگ جۇرگىزىلىپ جاتىر. اگەنتتىك ەلىمىزدىڭ بارلىق ءوڭىرى بويىنشا جالپى بيۋدجەتى 2,44 تريلليون تەڭگەنى قۇرايتىن وسىنداي 156 نىسان بار ەكەنىن انىقتاعان.
ازاماتتىق قوعاممەن ءوزارا تىعىز قارىم-قاتىناس ورناتۋ ارقىلى "سىبايلاس جەمقورلىققا قارسى ۆولونتەرلىك" جوباسى ىسكە اسىرىلۋدا. قازىرگى ۋاقىتتا جەمقورلىقتىڭ بەلەڭ الۋىنا بەي-جاي قارامايتىن 2 مىڭنان استام ازامات بۇل باستاماعا اتسالىسىپ جاتىر، دەلىنگەن حابارلامادا.
كەزدەسۋ سوڭىندا قاسىم-جومارت توقاەۆ جەمقورلىققا قارسى ءىس-قيمىلدى جانە الدىن الۋ شارالارىن كۇشەيتۋگە باعىتتالعان جۇيەلى جۇمىستى جالعاستىرۋ جونىندە بىرقاتار ناقتى تاپسىرما بەردى.
