قازاقستاندا جۇمىسپەن قامتىلعان حالىق سانى 39% ءوستى. بۇل تۋرالى ۇلتتىق ستاتيستيكا بيۋروسى 2021 جىلعى حالىق ساناعىنىڭ قورىتىندىسى بويىنشا حالىقتى جۇمىسپەن قامتۋ بويىنشا كەزەكتى جيناقتى شىعاردى، دەپ حابارلايدى “ادىرنا” ۇلتتىق پورتالى.
جيناقتا سالالار، جىنىس جانە جاس قۇرىلىمى بويىنشا جۇمىسپەن قامتۋ دەڭگەيى جونىندەگى كورسەتكىشتەردى، سونداي-اق 2009 جىلعى ساناقپەن سالىستىرعانداعى ديناميكالىق وزگەرىستەردى كورۋگە بولادى. جيناقتىڭ ەكى تومى stat.gov.kz سايتىنىڭ «ۇلتتىق ساناقتار» – «ساناق 2021» بولىمىندە ورنالاستىرىلعان.
سونداي-اق، 2021 جىلعى ساناق قورىتىندىسى بويىنشا جۇمىسپەن قامتىلعان حالىق سانى 9 188 مىڭ ادامدى قۇرادى، 2009 جىلعى ساناقپەن سالىستىرعانداعى ءوسىم – 39,2%.
جۇمىسپەن قامتىلعانداردىڭ نەگىزگى ۇلەسى قالالىق ەلدىمەكەندەردە – جۇمىسپەن قامتىلعان حالىقتىڭ 62,5% نەمەسە 5,7 ميلليوننان استامى. 2009 جىلى قالالارداعى جۇمىسپەن قامتىلعان حالىقتىڭ ۇلەسى 57,1% نەمەسە 3,8 ملن ادامدى قۇراعان. جاس توبى بويىنشا جۇمىسپەن قامتىلعانداردىڭ ەڭ كوپ سانى 30-34 جاس ارالىعىندا – 1 450 مىڭ ادام. 2009 جىلعى ساناق قورىتىندىسىمەن سالىستىرعاندا 2021 جىلى جوعارى ءبىلىمى بار حالىقتىڭ جۇمىسپەن قامتىلۋ ۇلەسى 27,1%-دان 30,8%-عا دەيىن ارتتى.
جۇمىسپەن قامتۋداعى ايەلدەردىڭ ۇلەسى 2009 جىلعى 45%-دان 2021 جىلى 48%-عا دەيىن نەمەسە 1,4 ملن ادامعا ارتتى.
سالالار بولىنىسىندە جۇمىسپەن قامتىلعانداردىڭ ەڭ كوپ سانى اۋىل شارۋاشىلىعىندا – 1,41 ملن ادام نەمەسە جۇمىسپەن قامتىلعان حالىقتىڭ 15,3% (17,9% – 2009 جىلى). ودان كەيىن كوتەرمە جانە بولشەك ساۋدا – 1,35 ملن ادام نەمەسە 14,7% (12,9% – 2009 جىلى). جۇمىسپەن قامتۋ بويىنشا ءۇشىنشى ورىندى ونەركاسىپ سالاسى الادى – 1 ملن ادام نەمەسە 11,1% (11,5% – 2009 جىلى).
بارلىق جۇمىسپەن قامتىلعان حالىقتىڭ ىشىندە ەرلەردىڭ ەڭ كوپ ۇلەسى نەمەسە 17% اۋىل شارۋاشىلىعىندا، ال ايەلدەر بويىنشا نەگىزىنەن ساۋدا سالاسىندا – 16%، دەلىنگەن حابارلامادا.
