قازاقستان +997 كودىنان باس تارتىپ، تاعى دا رەسەيمەن بىرگە ەكەنىن پاش ەتتى

2176
Adyrna.kz Telegram

قازاقستان +7 تەلەفون كودىن وزگەرىسسىز قالدىرادى. بۇل تۋرالى تسيفرلىق دامۋ مينيسترلىگى جاڭا كودقا كوشۋگە بولاتىنىن، بىراق قارجىلىق جانە تەحنولوگيالىق پروبلەمالار تۋىندايتىنىن ايتتى، دەپ حابارلايدى “ادىرنا” ۇلتتىق پورتالى.

مينيسترلىكتىڭ مالىمەتىنشە، جەكە كودتى الۋ ماقساتىندا 2021 جىلى قازاقستان +997 حالىقارالىق تەلەفون كودىن رەزەرۆكە قويعان. بىراق سونى ەنگىزۋگە قارجىلىق جاعداي مەن باسقا دا بىرقاتار ماسەلەلەر قولبايلاۋ ەكەنى ايتىلىپ وتىر.

"قارجىلىق، تەحنولوگيالىق پروبلەمالار"

مينيسترلىك وسى جاعداي تۇسىندىرگەن حابارلاماسىندا جاعدايدىڭ قانداي ەكەنىن تۇسىندىرەدى.

"قازاقستان مەن رەسەيدىڭ بايلانىس ۆەدومستۆولارى اراسىندا جاسالعان «دۇنيەجۇزىلىك نومىرلەۋدىڭ 7-ايماعىنىڭ نومىرلەنۋىن پايدالانۋ تۋرالى» 2006 جىلعى 17 ماۋسىمداعى كەلىسىمگە سايكەس، قازاقستان قازىرگى ۋاقىتتا رەسەي فەدەراتسياسىمەن بىرلەسىپ «+7» ينتەگراتسيالانعان حالىقارالىق كودىن پايدالانادى. جەكە كودتى الۋ ماقساتىندا 2021 جىلى قازاقستان +997 حالىقارالىق تەلەفون كودىن رەزەرۆكە قويدى. بايلانىس وپەراتورلارىمەن جاڭا كودقا كوشۋ ماسەلەسىن پىسىقتاۋدا جاڭا كودقا كوشۋگە بولاتىنى، بىراق بىرقاتار قارجىلىق جانە تەحنولوگيالىق پروبلەمالارعا اكەپ سوقتىراتىنى ايتىلدى", - دەپ جازىلعان تسيفرلىق دامۋ مينيسترلىگىنىڭ حابارلاماسىندا.

سونىمەن قاتار، وتاندىق بايلانىس وپەراتورلارىنىڭ بارلىق ابونەنتتەرىنە مەملەكەتتىك جانە بانكتىك قىزمەتتەردى، الەۋمەتتىك جەلىلەردى جانە ءتۇرلى قوسىمشالاردى الۋ ءۇشىن بارلىق سەرۆيستەردە ءوز دەرەكتەرىن جاڭارتۋ قاجەتتىلىگى تۋىندايدى. تيىسىنشە، وتپەلى كەزەڭدە ساتسىزدىكتەر مەن جاعىمسىز تاجىريبەلەر ىقتيمالدىعى جوعارى ەكەنى ايتىلادى.

رەسەيمەن جاڭا كەلىسىم

تسيفرلىق دامۋ مينيسترلىگى وسى ورايدا رەسەيمەن كەلىسسوز جۇرگىزىلگەنىنەن قۇلاعدار ەتكەن.

"مينيسترلىك حالىقارالىق تەلەكوممۋنيكاتسيا وداعىمەن قايتا كەلىسسوزدەر جۇرگىزىپ، +7 حالىقارالىق كودىن وزگەرتپەي قالدىرۋ تۋرالى شەشىم قابىلدادى. وسىعان بايلانىستى رەسەي فەدەراتسياسىنىڭ تسيفرلىق دامۋ، بايلانىس جانە بۇقارالىق كوممۋنيكاتسيالار مينيسترلىگىمەن رەسەي فەدەراتسياسىنىڭ ۇكىمەتى مەن قازاقستان ۇكىمەتى اراسىندا دۇنيەجۇزىلىك نومىرلەۋدىڭ 7-ءشى ايماعىنىڭ ءنومىرىن پايدالانۋ تۋرالى جاڭا كەلىسىم جاساۋ ماسەلەسى پىسىقتالدى. قازىرگى ۋاقىتتا جوبا مەملەكەتتىك ورگاندارمەن جانە مۇددەلى تاراپتارمەن كەلىسىلگەن. كەلىسۋ ناتيجەلەرى بويىنشا جوبا رەسەي فەدەراتسياسىنداعى ديپلوماتيالىق ارنالار ارقىلى جىبەرىلدى»، - دەيدى ۆەدومستۆو.

قازىرگى ۋاقىتتا رەسەي فەدەراتسياسى جاعىندا مەملەكەتىشىلىك قايتا كەلىسۋ راسىمدەرى ءجۇرىپ جاتىر. ءارى قاراي جوبانى كەلىسۋ تۋرالى رەسەي فەدەراتسياسىنىڭ نوتاسىن العان سوڭ كەلىسىمگە قول قويۋ جانە قابىلداۋ جۇمىستارى جۇرگىزىلەدى.

ايتا كەتەيىك، قازاقستان «+7» حالىقارالىق كودىن كسرو ىدىراعاننان بەرى قولدانىپ كەلەدى. 2006 جىلى رەسەيمەن ءتيىستى كەلىسىمگە قول قويدى. 2021 جىلى قازاقستان +997 حالىقارالىق تەلەفون كودىن رەزەرۆكە قويعان.

2021 جىلدىڭ قىركۇيەگىندە تسيفرلىق دامۋ ءمينيسترى باعدات مۋسين قازاقستان تاۋەلسىزدىگىنىڭ 30 جىلدىعىنا ارنالعان ءنومىردى رەزەرۆتەۋدى «سيمۆولدىق» دەپ اتادى.

«بۇرىن ءبىز رەسەيمەن بىرگە +7 كودىن بولىسەتىن ەدىك، ەندى ءبىزدىڭ ەلدەن شەتەلگە قوڭىراۋ شالعاندا «قازاقستان» دەگەن جازۋ شىعادى. +997-گە تولىق كوشۋ بىزگە ۇلتتىق نومىرلەۋ رەسۋرسىن دەربەس تاراتۋعا مۇمكىندىك بەرەدى. ابونەنتتەر مەن قىزمەتتەر سانى بويىنشا ۇلتتىق جۇيەنى كەڭەيتۋ كەرەك»، - دەگەن ەدى باعدات مۋسين.

پىكىرلەر