ەكىباستۇزدا اناسى ءوز قولىمەن ءولتىردى دەلىنگەن جەتى جاسار ميلانا داۆىدوۆا جەر قوينىنا تاپسىرىلدى. قوشتاسۋعا كەلگەن ەرىكتىلەر قىلمىسقا بارعان كەلىنشەكتىڭ جاۋىزدىق ارەكەتتەرىن بايانداعان، دەپ حابارلايدى "ادىرنا" كتك تەلەارناسىنا سىلتەمە جاساپ.
جەرلەۋ ءراسىمىن وتكىزۋدى وقۋشىنىڭ ناعاشىلارى موينىنا العان. بىراق تۋىستارىنىڭ ەشكىممەن اشىلىپ سويلەسۋگە زاۋقى بولماعان. ەسەسىنە ەرىكتىلەر قولداۋ كورسەتىپ، ىزدەۋ كەزىندە جانە ءبۇلدىرشىننىڭ ءمايىتى تابىلعان ساتتەگى جايتتى ايتىپ ءجۇر. ولاردىڭ سوزىنشە، قىزعا اناسى قاتال قاراعانى جايلى ەكى باۋىرى ايتىپ بەرىپتى. 6 جانە 9 جاستاعى ۇلدارىنا ساۋساعىنىڭ ۇشىن دا تيگىزبەگەن. ال ميلانانى ۇنەمى اياماي ساباعان كورىنەدى.
قىلمىس بولاتىن كۇنى دە ۇلدارىن كورشىسىنە اپارىپ تاستاپ قىزىن ۇرىپ ولتىرگەنى ايتىلدى. ارتىنشا اشىناسىنا ايتىپ، ءمايىتتى ۇيىلگەن قوقىس اراسىنا كومدىرىپ تاستاعان دەسەدى. بالاسىنىڭ جوعالعانىن ايتىپ، سوسىن جۇرتتان كومەك سۇراپتى. قازىر كۇدىكتى كەلىنشەك سىبايلاسىمەن بىرگە قاماۋدا وتىر. ەكى بالاسىن بەيىمدەۋ ورتالىعىنا الىپ كەتتى. ميلانانى اتاسى مەن اجەسىنىڭ جانىنا جەرلەدى.
«ۇلكەن ۇلى ميلانانى اناسى ۇنەمى ۇراتىنىن ايتتى. باۋىرلارىنىڭ بىرەۋى التى جاستا، ەكىنشىسى توعىزدا. ولاردى بىردەن الىپ كەتتى. ال اناسى قىزىن «نەگە ءولتىردىڭ» دەگەن ساۋالعا تەرگەۋشىلەرگە «بالالارىم شارشاتتى، ەشكىمدى تىڭدامايدى» دەپ اقتالعان. بالانى سول ءۇشىن ولتىرۋگە بولا ما؟»، — دەيدى ەرىكتى ولەسيا كانونەنكو.
