Ekibastuzda anasy óz qolymen óltirdi delingen jeti jasar Mılana Davydova jer qoınyna tapsyryldy. Qoshtasýǵa kelgen eriktiler qylmysqa barǵan kelinshektiń jaýyzdyq áreketterin baıandaǵan, dep habarlaıdy "Adyrna" KTK telearnasyna silteme jasap.
Jerleý rásimin ótkizýdi oqýshynyń naǵashylary moınyna alǵan. Biraq týystarynyń eshkimmen ashylyp sóılesýge zaýqy bolmaǵan. Esesine eriktiler qoldaý kórsetip, izdeý kezinde jáne búldirshinniń máıiti tabylǵan sáttegi jaıtty aıtyp júr. Olardyń sózinshe, qyzǵa anasy qatal qaraǵany jaıly eki baýyry aıtyp beripti. 6 jáne 9 jastaǵy uldaryna saýsaǵynyń ushyn da tıgizbegen. Al Mılanany únemi aıamaı sabaǵan kórinedi.
Qylmys bolatyn kúni de uldaryn kórshisine aparyp tastap qyzyn uryp óltirgeni aıtyldy. Artynsha ashynasyna aıtyp, máıitti úıilgen qoqys arasyna kómdirip tastaǵan desedi. Balasynyń joǵalǵanyn aıtyp, sosyn jurttan kómek surapty. Qazir kúdikti kelinshek sybaılasymen birge qamaýda otyr. Eki balasyn beıimdeý ortalyǵyna alyp ketti. Mılanany atasy men ájesiniń janyna jerledi.
«Úlken uly Mılanany anasy únemi uratynyn aıtty. Baýyrlarynyń bireýi alty jasta, ekinshisi toǵyzda. Olardy birden alyp ketti. Al anasy qyzyn «nege óltirdiń» degen saýalǵa tergeýshilerge «balalarym sharshatty, eshkimdi tyńdamaıdy» dep aqtalǵan. Balany sol úshin óltirýge bola ma?», — deıdi erikti Olesıa Kanonenko.
