22 قاراشا الماتى قالاسىنداعى «اتاكەنت» كو «ۇلى جىبەك جولىمەن–2023» XI حالىقارالىق كىتاپ جانە پوليگرافيا كورمەسىنىڭ فورۋمى الاڭىندا قازاقتىڭ بەلگىلى اقىنى عالىم جايلىبايدىڭ «جالعىز قاراعاي» اتتى جىر جيناعىنىڭ تۇساۋكەسەرى ءوتتى، دەپ حابارلايدى «ادىرنا» ۇلتتىق پورتالى.
اباي اتىنداعى مەملەكەتتىك سىيلىقتىڭ جانە تۇركى الەمىنىڭ «تۇرىك بىرلىگى» ادەبي سىيلىعىنىڭ لاۋرەاتى، قازاقستاننىڭ ەڭبەك سىڭىرگەن قايراتكەرى، حالىقارالىق «الاش» ادەبي سىيلىعى مەن «قۇرمەت» وردەنىنىڭ يەگەرى، قازاقتىڭ بەلگىلى اقىنى عالىم جايلىبايدىڭ «جالعىز قاراعاي» اتتى جىر جيناعى «اتامۇرا» باسپاسىندا جارىق كوردى.
قازاق پوەزياسىندا وزىندىك ورنى بار اقىننىڭ بۇل كىتابىنا كەيىنگى جىلداردا جازىلعان ولەڭدەرى مەن پوەمالارى توپتاستىرىلعان. اقىننىڭ ايتۋىنشا، كىتاپتا ازاماتتىق، ەل، جەر تۋرالى، پاندەميا كەزى مەن «قاڭتار وقيعاسى» تۋرالى ولەڭدەرى دە بار.
«بۇگىنگى كورمەدە «جالعىز قاراعاي» دەگەن كىتابىمنىڭ تۇساۋى كەسىلدى. بۇل ۋاقىتقا دەيىن كوپتەگەن كىتاپ جازدىم. ال بۇل كىتابىمنىڭ ەرەكشەلىگى «اتامۇرا» سەكىلدى ەلىمىزدىڭ ءورىستى، وركەنيەتتى، قاسيەتتى باسپاسىنان شىعۋى. «اتامۇرا» كىتاپحاناسى سەرياسى بويىنشا جىگىتتەر اسا جاۋاپكەرشىلىكپەن دايىندادى، ريزا بولدىم. ودان كەيىن كىتاپتىڭ «جالعىز قاراعاي» اتالۋى دا بەكەر ەمەس. قازاقتىڭ بەلگىلى ءانشىسى اسەت نايمانباەۆتىڭ ءمايىتى ارعى بەتتە جاتىر. سول مايىتكە نايمانباي قىستاعىنداعى اكەسىنىڭ توپىراعىن اپارىپ قوستىم. سول جەردىڭ اتى جالعىز قاراعاي اتالادى ەكەن. سوندىقتان وسى كىتاپتىڭ اتىن «جالعىز قاراعاي» قويعىم كەلدى. ىشىندە شاعىن پوەمام، ازاماتتىق، ەل مەن جەر تۋرالى، پاندەميا مەن «قاڭتار وقيعاسى» كەزىندە جازىلعان كوپ ولەڭدەر بار»، -دەدى اقىن عالىم جايلىباي.
اقىننىڭ ولەڭدەرىندە ءومىر، تاعدىر، تابيعات تىلسىمدارى ءوزارا استاسىپ جاتادى. جىرلارىنداعى ليريكالىق ىشكى يىرىمدەرىمەن قوسا فيلوسوفيالىق وي ءتۇيۋى وقىرمان كوڭىلىنەن شىعىپ كەلەدى.
سياسى كەپپەگەن جاڭا باسىلىمنىڭ تۇساۋكەسەرىنە قازاقتىڭ بەلگىلى اقىن-جازۋشىلارى كەلىپ، ىزگى تىلەكتەرىن ءبىلدىرىپ كەتتى. اباي اتىنداعى رەسپۋبليكالىق مامانداندارىلعان دارىندى بالالارعا ارنالعان ورتا-مەكتەپ ينتەرناتىنىڭ وقۋشىلارى اقىننىڭ تۋىندىلارىن وقىدى. ال تۋىندىنى باسىپ شىققان «اتامۇرا» باسپاسى اقىنعا ات مىنگىزدى.
«بەلگىلى اقىن، مەملەكەتتىك سىيلىقتىڭ يەگەرى عالىم جايلىباي اعامىزدىڭ «جالعىز قاراعاي» كىتابىنىڭ تۇساۋى كەسىلۋدە. كىتاپتا 126 ولەڭ، 3 پوەما ەنىپ وتىر. كىتاپتى كوزى قاراقتى، كوكىرەگى وياۋ جاستار مەن وقىرمان وقيدى دەپ ويلايمىن. ويتكەنى، تۋىندى وي سالماي قويمايدى.
ءبىزىڭ باسپا 3 باعىتتا كىتاپ شىعارادى. ءبىرىنشىسى – «اتامۇرا» كىتاپحاناسى سەرياسى. وندا 200-گە جۋىق قازاقتىڭ ەڭ تاڭداۋلى اقىن-جازۋشىسىنىڭ كىتابى ىرىكتەلگەن. ولار اباي، مۇحتار اۋەزوۆتەردەن باستالىپ، كوزى ءتىرى كلاسسيكتەرمەن جالعاسىن تابادى»، - دەدى «اتامۇرا» كورپوراتسياسىنىڭ پرەزيدەنتى راقىمعالي قۇل-مۇحاممەد.
ايتا كەتەيىك، «اتامۇرا» باسپاسى قازاقتىڭ بەلگىلى قالامگەرلەرىمەن بىرگە ەل اۋزىندا جۇرگەن، الايدا شىعارمالارى سيرەك جارىق كورگەن ناعىز تالانتتاردىڭ تۋىندىلارىن، سونداي-اق جىرى جاۋھار، ءسوزى تۇماداي تۇنىق جاستاردى دا تاپ باسىپ تانىپ، ولاردىڭ ەڭبەكتەرىن تالعامپاز وقىرمان قاۋىمعا ۇسىنىپ ءجۇر.
باسپا ءبىراز جىلدان بەرى كوپشىلىك وقىرمانعا ارنالعان «اتامۇرا» كىتاپحاناسى» جانە مەكتەپ جاسىنداعى بالالارعا ارنالعان «اتامۇرا» مەكتەپ كىتاپحاناسى»، سونىمەن قاتار بۇلدىرشىندەرگە ارنالعان «مەنىڭ العاشقى كىتاپشام» اتتى سەريالارىن شىعارىپ كەلەدى. «اتامۇرا» كىتاپحاناسى» جانە «اتامۇرا» مەكتەپ كىتاپحاناسى» سەريالارى بويىنشا قازاقتىڭ تانىمال اقىن-جازۋشىلاردىڭ شىعارمالارىن باسىپ شىعارۋ داستۇرگە اينالعان.
