ۇكىمەت باسشىسى ءاليحان سمايىلوۆ ەكس-پرەزيدەنت نۇرسۇلتان نازارباەۆتىڭ باۋىرى بولات نازارباەۆتىڭ قازاسىنا نە ءۇشىن بارعانىن ءتۇسىندىردى، دەپ حابارلايدى “ادىرنا” ۇلتتىق پورتالى.
بۇگىن سەناتتىڭ جالپى وتىرىسىنان كەيىن تىلشىلەر ۇكىمەت باسشىسىنا «وتكەن جولى ەكس-پرەزيدەنت نۇرسۇلتان نازارباەۆتىڭ ءىنىسى بولات نازارباەۆتىڭ جانازاسىنا باردىڭىز. ءسىزدىڭ بارعانىڭىز الەۋمەتتىك جەلىدەگى حالىقتىڭ اراسىندا تالقىلانىپ، سىنالدى. جالپى ءسىزدىڭ بۇل جانازاعا بارۋىڭىز ازاماتتىق پوزيتسيا ما، جوق الدە پروتوكول بولدى ما؟» دەگەن سۇراق قويىلدى.
«اتا-بابامىزدان كەلە جاتقان ءداستۇرىمىز بار، ول قايتىس بولعان ادامنىڭ جاقىندارى مەن تۋىستارىنا كوڭىل ايتۋ. سوندىقتان مەن پرەمەر-مينيستر رەتىندە تۇڭعىش پرەزيدەنتكە كوڭىل ايتۋدى ءجون دەپ سانادىم. ونىڭ ۇستىنە سول كۇنى الماتى قالاسىندا ءىس ساپارمەن بولعانمىن. ۇلكەن، وتە ماڭىزدى جوبانى باستادىق. ول الماتى قالاسىنىڭ اينالما تەمىر جولىنىڭ قۇرىلىسىنىڭ باستاماسى بولدى. ول ءبىزدىڭ كولىكتىك، ترانزيتتىك الەۋمەتتىك كوتەرۋ ءۇشىن وتە ماڭىزدى جوبا. سوندىقتان سول كۇنى الماتىدا ءىس-ساپارمەن بولدىم جانە جاڭا ايتىلعانداي تۇڭعىش پرەزيدەنتكە كوڭىل ايتۋدى ءجون سانادىم»، – دەدى پرەمەر-مينيستر.
