كوكشەتاۋ قالاسىنىڭ كەي اۋداندارىندا تۇرعىندار جىلۋ جۇيەسىنىڭ جوقتىعىنا نارازى، دەپ حابارلايدى "ادىرنا" ءتىلشىسى Massager.kz-كە سىلتەپ.
كوكشەتاۋلىق تۇرعىندار جىلۋسىز وتىرعانىنا شاعىمداندى. ولار قاقاعان قىس جاقىنداعاندا ۇيدەگى باتارەيالاردىڭ جىلىمايتىنىن، بولمە تەمپەراتۋراسى بار بولعانى 19 گرادۋستى كورسەتىنىن ايتادى.
"قالا اكىمدىگىنە جانە "كوكشەتاۋ جىلۋ" كوممۋنالدىق كاسىپورنىنا دا شاعىمداندىق. "جايلاۋ" شاعىن اۋدانىنداعى ۇيلەر وتە سۋىق. باتەرەيالار ساپ-سالقىن. ال ءىس جۇزىندە قول تيگىزبەيتىندەي ىستىق بولۋى كەرەك قوي. بولمە تەمپەراتۋراسى 19 گرادۋستان اسپايدى. بۇل دەگەنىڭىز سۇمدىق قوي. اسىرەسە تاڭەرتەڭ ءۇيدىڭ ءىشى مۇلدە سۋىپ كەتەدى. ءتىپتى ۇيدە ەمەس، گاراجدا ويانعانداي بولاسىڭ. "كوكشەتاۋ جىلۋ" كوممۋنالدىق كاسىپورنىنا ءتيىستى شارا قابىلداپ، مامان جىبەرۋدى جانە شىن مانىندە بارىنە كوز جەتكىزۋدى سۇرادىق. بىراق ەشكىم ءبىزدىڭ جانايقايىمىزعا نازار دا اۋدارمادى. كورشى ۇيلەردىڭ بارىندە دە وسىنداي جاعداي", - دەيدى "جايلاۋ" شاعىن اۋدانىنىڭ تۇرعىندارى.
الايدا اتالمىش كاسىپورىن تۇرعىندار تاراپىنان ەشقانداي شاعىمنىڭ تۇسپەگەنىن العا تارتادى.
"كاسىپورىننىڭ ديسپەتچەرلىك قىزمەتىنە اتالعان مەكەنجاي بويىنشا ەشقانداي شاعىم تۇسكەن جوق. جىلۋ ينسپەكتسياسى قىزمەتكەرلەرى اتالعان مەكەنجايلارعا ينسپەكتسيالىق شىعۋ ۇيىمداستىرىلىپ، ءتيىستى شارالار جۇرگىزىلەتىن بولادى", - دەدى "كوكشەتاۋ جىلۋ" كوممۋنالدىق كاسىپورنىنىڭ ءباسپاسوز قىزمەتى.
