جەلىدە مۇز استىنا قۇلاپ كەتكەن ءجاسوپىرىمدى استانالىق بەيتانىس ازاماتتىڭ قۇتقارىپ قالعان ۆيدەوسى تارادى. بالا اق بۇلاق وزەنىنە باتىپ كەتە جازداعان، دەپ حابارلايدى "ادىرنا" پورتالى. ۆيدەو Instagram پابليكتەرىندە جاريالاندى.
«كەزدەيسوق وتكەن ادامداردىڭ، اسىرەسە وسى جىگىتتىڭ ارقاسىندا ءبارى جاقسى اياقتالدى. ول ويلانباستان ارقاندى وزىنە بايلاپ، قۇتقارۋعا كومەكتەستى. بالانىڭ مۇز استىنا قالاي تۇسكەنى بەلگىسىز، كۋاگەرلەردىڭ ايتۋىنشا، تەلەفونمەن سويلەسىپ، مۇز ۇستىندە جۇرگەن»، - دەپ جازىلعان پاراقشادا.
قالالىق تج دەپارتامەنتى بايقوڭىر اۋدانىندا اممان كوشەسى بويىنداعى اقبۇلاق وزەنىندە بولعان وقيعانى راستادى.
«قۇتقارۋشىلار كەلگەنشە سۋعا باتقان ءجاسوسپىرىمدى كەزدەيسوق ءوتىپ بارا جاتقان ەر ادام قۇتقاردى. ول ءجاسوسپىرىمدى سۋدان جاعاعا شىعارىپ، جەدەل جاردەم بريگاداسىنا تاپسىرعان، وندا بالاعا العاشقى مەديتسينالىق كومەك كورسەتىلدى. قازىرگى ۋاقىتتا ءجاسوسپىرىم №2 بالالار اۋرۋحاناسىندا جاتىر. باقىتىمىزعا وراي، ول قۇتقارىلدى، بىراق قايعىلى جاعدايدان ساقتانۋعا ەشكىمدە كەپىلدىك جوق»، - دەپ حابارلادى دەپارتامەنت.
سونىمەن بىرگە، دەپارتامەنت قاراشا مەن جەلتوقسان ايلارىندا كۇزگى مۇزدىڭ قاۋىپتى بولاتىنىن دا ەسكەرتتى.
«قۇرمەتتى تۇرعىندار، ءوز قاۋىپسىزدىگىڭىز ءۇشىن جۇقا مۇزعا شىعۋعا تىيىم سالىنعانىن ۇمىتپاڭىز. مۇزدا بالىق اۋلاۋدى ۇناتاتىندار مىندەتتى تۇردە قۇتقارۋ كەۋدەشەسىن كيۋى كەرەك. قالىڭدىعى كەمىندە 10 سانتيمەتر بولاتىن مۇز ادامدارعا قاۋىپسىز بولىپ سانالادى. سۋ تەز اعاتىن جەرلەردە، اعىندى سۋلاردا، سونداي-اق سۋ وسىمدىكتەرى وسەتىن جەرلەردە، اعاشتار مەن قامىستىڭ جانىندا مۇز وتە ءالسىز بولادى. ەگەر اۋا تەمپەراتۋراسى 0 گرادۋستان جوعارى بولسا، بۇل اۋا رايى ءۇش كۇننەن ارتىق ساقتالسا، مۇز بەرىكتىگى 25% تومەندەيدى. توتەنشە جاعداي تۋىنداعان جاعدايدا 112 نومىرىنە قوڭىراۋ شالىڭىز» - دەلىنگەن حابارلامادا.
