«ساليمباي» نەمەسە «ساليمبويۆاچچا» دەگەن اتپەن تانىمال تاشكەنتتىك كاسىپكەر ساليم ابدۋۆاليەۆ زاڭسىز قارۋ ساقتاعانى ءۇشىن كۇدىكتى رەتىندە ۇستالدى. بۇل تۋرالى وزبەكستان استاناسىنىڭ ىشكى ىستەر باس باسقارماسىنىڭ ء(ىىب) ءباسپاسوز قىزمەتى مالىمدەدى، دەپ حابارلايدى «ادىرنا» ۇلتتىق پورتالى Fergana news پورتالىنا سىلتەمە جاساپ.
73 جاستاعى كاسىپكەر وزبەكستان رەسپۋبليكالىق قىلمىستىق كودەكسىنىڭ 248-بابىنىڭ 1-بولىگىندە («اتىس قارۋىن زاڭسىز ساقتاۋ») كوزدەلگەن قىلمىستى جاسادى دەگەن كۇدىكپەن ءىس جۇرگىزۋ تارتىبىمەن ۇستالدى.
ورتالىق ىشكى ىستەر باسقارماسى ءىستىڭ باسقا جاي-جاپسارىن جانە ابدۋۆاليەۆكە قانداي شارا تاعايىندالعانىن ناقتىلامادى.
ايتا كەتەيىك، بىرنەشە كۇن بۇرىن كەيبىر باق ابدۋۆاليەۆتىڭ ۇستالعانى تۋرالى حابارلاعان بولاتىن. الايدا تاشكەنتتىڭ قۇقىق قورعاۋ ورگاندارى بۇل اقپاراتقا قاتىستى تۇسىنىكتەمە بەرمەگەن.
ودان بولەك، «سايدازيز مەدگورودوك» لاقاپ اتى بار سايدازيز سايداليەۆ، سونداي-اق «باحتي تاشكەنتسكي» دەگەن اتپەن تانىمال باحتيور كۋدراتيللاەۆ ەسىرتكى ساقتادى دەگەن ايىپپەن ۇستالعان.
سونىمەن قاتار تاشكەنت ءىىب تاعى ون ادامنىڭ ۇستالعانى تۋرالى حابارلادى. ولاردىڭ بارلىعى بوپسالاۋ نەمەسە بۇزاقىلىق تۋرالى باپتار بويىنشا قىلمىستىق ىسكە كۇدىكتى رەتىندە تارتىلدى.
ساليم ابدۋۆاليەۆ – ەڭ تانىمال مەتسەناتتاردىڭ ءبىرى. ول قىلمىستىق الەمنىڭ وكىلى بولىپ سانالادى، مىسالى، بىرنەشە جىل بۇرىن اقش-تىڭ وزبەكستانداعى ەلشىسى ءوزىنىڭ ديپلوماتيالىق حاتتارىندا ونى «وزبەك مافياسىنىڭ باسشىسى» دەپ اتاعان. كاسىپكەر وزبەكستاننىڭ كۇرەس قاۋىمداستىعىن باسقارادى، سونىمەن قاتار ەلدىڭ ۇلتتىق وليمپيادا كوميتەتى توراعاسىنىڭ ورىنباسارى. 2015 جىلى ابدۋۆاليەۆ «دۋستليك» وردەنىمەن ماراپاتتالسا، 2021 جىلى «ەڭبەك سىڭىرگەن سپورت جاتتىقتىرۋشىسى» اتاعىن الدى.
«ادىرنا» ۇلتتىق پورتالى
