سولتۇستىك قازاقستان وبلىسىندا اكىمشىلىك پوليتسەيلەر قىس باستالعالى اۆتوجولدار مەن كوشە-جول جەلىسىنە 160 تەكسەرۋ جۇرگىزدى. ناتيجەسىندە جۇمىسىنا نەمقۇرايلى قاراعان 14 لاۋازىمدى تۇلعا جازالاندى، دەپ حابارلايدى “ادىرنا” ۇلتتىق پورتالى.
سقو پوليتسيا دەپارتامەنتى ءباسپاسوز قىزمەتىنىڭ مالىمەتىنشە، اكىمشىلىك پوليتسيا مىندەتتەرىنىڭ ءبىرى – اۆتوموبيل جولدارىنداعى قاۋىپسىز قوزعالىس ءۇشىن جاعداي جاساۋ. قىس باستالىسىمەن جول قىزمەتتەرىنىڭ جۇمىسى كوبەيدى. الايدا ولاردىڭ اراسىندا ءوز ىسىنە ءجۇردىم-باردىم قارايتىندار دا بار. ولاردىڭ قىزمەتىن باقىلاۋ جانە قاداعالاۋ اكىمشىلىك پوليتسيا باسقارماسىنىڭ قۇزىرەتىندە.
سقو-دا بيىل كوشە-جول جەلىسىن كۇتىپ ۇستاۋ جۇمىستارىنا 500-گە جۋىق تەحنيكا جۇمىلدىرىلعان. قىس باستالعالى اكىمشىلىك پوليتسەيلەر جول جانە كوممۋنالدىق ورگانداردىڭ وكىلدەرىمەن بىرلەسىپ، اۆتوموبيل جولدارى مەن كوشە-جول جەلىسىنە 160 تەكسەرۋ جۇرگىزدى. ونىڭ بارىسىندا جول قوزعالىسىنىڭ قاۋىپسىزدىگىنە كەرى اسەرىن تيگىزەتىن 65 ولقىلىق انىقتالدى. انىقتالعان كەمشىلىكتەردى جويۋ بويىنشا 54 ۇيعارىم بەرىلىپ، جولداردى كۇتىپ ۇستاۋعا جاۋاپتى 14 لاۋازىمدى تۇلعا اكىمشىلىك جاۋاپكەرشىلىككە تارتىلدى.
جەرگىلىكتى اتقارۋشى ورگاندارعا جول قىزمەتتەرىنىڭ قار جاۋعان سوڭ بىردەن ءتيىستى جۇمىستاردى جۇرگىزۋ قاجەتتىگى تۋرالى ۇسىنىم جىبەرىلدى.
