ەلىمىز وركەن جايىپ، كەڭگە سەرمەۋى ءۇشىن باستى ماسەلە جاس ۇرپاقتىڭ ءبىلىمدى دە تاربيەلى بولىپ جەتىلۋ ەكەنى بەلگىلى. ءبىلىم بەرۋ جۇيەسىندە جاڭا تەحنولوگيانى قولدانۋ ارقىلى كەلەشەك ۇرپاقتىڭ ەركىن دامۋىنا، جان-جاقتى ءبىلىم الۋىنا، بەلسەندى، شىعارماشىل بولۋىنا جاعداي جاساۋ ءار ءبىلىم ورداسىنىڭ مىندەتى. وسى رەتتە،ءوزىم ءبىلىم الىپ وتىرعان ءال- فارابي اتىنداعى قازاق ۇلتتىق ۋنيۆەرسيتەتىنىڭ ماقساتى وتاندىق جانە شەتەلدىك ەڭبەك نارىعىندا باسەكەگە قابىلەتتى، الەمدىك ءبىلىم بەرۋ كەڭىستىگىندە ورىن الاتىن، قولدانبالى جانە ىرگەلى زەرتتەۋلەردى دامىتىپ، ولاردى وندىرىستە قولدانۋعا ءوز ۇلەستەرىن قوساتىن جوعارى مامان يەلەرىن دايىنداۋ ەكەنىن بولىسكىم كەلەدى.
قاراشاڭىراق جىل سايىن QS, THE, ARES سياقتى ەڭ بەدەلدى حالىقارالىق رەيتينگتەردە العا شىعىپ، زور عىلىمي الەۋەتى مەن جوعارى باسەكەگە قابىلەتتىلىگىن ايقىن دالەلدەپ كەلەدى. اتاپ ايتار بولساق، شىعىس ەۋروپا جانە ورتالىق ازيا ەلدەرى بويىنشا QS World University Rankings (QS World University Rankings EECA 2020) رەيتينگىندە قازۇۋ 16-ورىنعا يە.
ءال-فارابي اتىنداعى قازۇۋ تۇلەكتەردى جۇمىسقا ورنالاستىرۋ رەيتينگىندە (QS Graduate Employability Rankings) 550 جوو-نىڭ ىشىنەن 201-251-ورىندى العان ورتالىق ازياداعى العاشقى جوو بولدى.
بريتاندىق "Times Higher Education" اگەنتتىگىنىڭ زەرتتەۋ ناتيجەلەرى بويىنشا قازۇۋ 1001-1200 پوزيتسياسىن ساقتاپ قالدى، Asia University Rankings رەيتينگىندە 401-500 - ورىن، THE Emerging Economies rankings-351-400-ورىن، the Impact Rankings رەيتينگىندە-801-1000 ورىندى يەلەندى.
Quacquarelli Symonds (QS) بەدەلدى حالىقارالىق رەيتينگتىك اگەنتتىگى جۇرگىزگەن تاۋەلسىز باعالاۋ قورىتىندىسى بويىنشا ءال-فارابي اتىنداعى قازاق ۇلتتىق ۋنيۆەرسيتەتى جوعارى باعا الىپ، «QS Stars Rating System» حالىقارالىق رەيتينگىسىندە «بەس جۇلدىز» جوعارى ماراپاتىنا يە بولدى. قازۇۋ – «بەس جۇلدىز» ماراپاتىنا يە بولعان ورتالىق ازيا ايماعىنداعى العاشقى جانە جالعىز جوعارى وقۋ ورنى.
ەڭ ەكولوگيالىق ۋنيۆەرسيتەتتەردىڭ "UI Green Metric Ranking of World Universities" جاھاندىق رەيتينگىندە ۋنيۆەرسيتەت 212-ءشى ورىنعا يە.
ۋنيۆەرسيتەت الەمنىڭ 500-گە جۋىق جەتەكشى جوعارى وقۋ ورىندارىمەن ارىپتەستىك ورناتىپ، ءبىلىم بەرۋ ىسىنە شەتەلدىك ۇزدىك عالىمداردى تارتىپ وتىر. سونىمەن قاتار اكادەميالىق ۇتقىرلىق، قوس ديپلوم، Erasmus+, Fulbright, DAAD, Mevlana, بولاشاق حالىقارالىق باعدارلامالارى جاس عالىمداردىڭ وزىق ەلدەردىڭ تاجىريبەسىن يگەرۋىنە كەڭىنەن جول اشۋدا.
قر جوعارى وقۋ ورىندارىنىڭ سۇرانىسقا يە ۇلتتىق رەيتينگىنە ەنگەن 135 وقىتۋشىنىڭ جارتىسىنان استامىن قازۇۋ قىزمەتكەرلەرى قۇرايدى. ۋنيۆەرسيتەتتىڭ وقىتۋشىلارى مەن عىلىمي قىزمەتكەرلەرى ءوز سالاسىنىڭ كوپتەگەن جەتىستىكتەرگە يە ماماندار. ناتيجەسىندە قازۇۋ ۋنيۆەرسيتەتىنىڭ ستۋدەنتتەرى ءوز مانسابىندا جەتىستىككە جەتۋگە كومەكتەسەتىن ساپالى ءبىلىم مەن عىلىمي ءبىلىم الۋعا مۇمكىندىك الادى. وقۋ بارىسىندا وقىتۋشىلار ءبىلىم الۋشىلارعا تەوريالىق بىلىممەن عانا شەكتەمەي،ونى پراكتيكا جۇزىندە ىسكە اسىرۋعا ىقپال ەتەدى.
ءوزىم فيلوسوفيا جانە ساياساتتانۋ فاكۋلتەتى، پەداگوگيكا جانە ءبىلىم بەرۋ مەنەدجمەنتى كافەدراسىنىڭ «الەۋمەتتىك پەداگوگيكا جانە ءوزىن-ءوزى تانۋ» ماماندىعىنىڭ 1 كۋرس ماگيسترانتىمىن. سوڭعى جىلدارى قازاقستاندا الەۋمەتتىك پەداگوگيكانى دامىتۋعا جانە قولداۋعا كوبىرەك كوڭىل بولىنۋدە. مەملەكەتتىك باعدارلامالار مەن باستامالار شەڭبەرىندە الەۋمەتتىك پەداگوگتار ءۇشىن ولاردىڭ كاسىبي داعدىلارى مەن قۇزىرەتتەرىن ارتتىرۋعا باعىتتالعان ترەنينگتەر، سەمينارلار جانە كاسىپتىك كۋرستار وتكىزىلۋدە. سونداي-اق الەۋمەتتىك وسال جاعدايداعى وقۋشىلاردىڭ قۇقىقتارىن قورعالۋىن قامتاماسىز ەتۋ ءۇشىن الەۋمەتتىك ءبىلىم بەرۋ سالاسىنداعى زاڭنامانى جەتىلدىرۋ بويىنشا جۇمىستار جۇرگىزىلۋدە. مەملەكەت ينكليۋزيۆتى ءبىلىم بەرۋ جاعدايلارىن جاساۋعا جانە بارلىق بالالار ءۇشىن تەڭ مۇمكىندىكتەردى قامتاماسىز ەتۋگە باعىتتالعان ساياساتتى ازىرلەۋگە جانە ەنگىزۋگە ۇلكەن ءمان بەرۋدە. سايكەسىنشە، قازىرگى تاڭدا قوعامداعى ەڭ وزەكتى دە قاجەتتى ماماندىقتىڭ ءبىرى.
الەۋمەتتىك پەداگوگيكا جانە ءوزىن-ءوزى تانۋ ماماندىعىنىڭ كاسىبي ءىس-ارەكەتىنىڭ مازمۇنى:
- وقۋ ورىندارىندا جانە تۇرعىلىقتى جەرiندە تۇلعانىڭ الەۋمەتتىك قۇقىقتارىن قورعاۋ;
- مامانداندىرىلعان ءبىلىم بەرۋ ۇيىمدارىندا جانە ارنايى ءبىلىم بەرۋ مەكەمەلەرىندە، پەداگوگيكالىق - تۇزەتۋ، وڭالتۋ جانە تاربيەلىك ءىس-ارەكەتتەرىن ۇيىمداستىرۋ;
- ءار ءتۇرلى الەۋمەتتىك توپتار، وسكەلەڭ ۇرپاق الەۋمەتتەندىرۋ جانە تۇلعالىق دامۋىنا الەۋمەتتىك- پەداگوگيكالىق كومەك كورسەتۋ;
- تۇلعالىق قاسيەتتەردى قالىپتاستىرۋدا وتباسىنا الەۋمەتتىك- پەداگوگيكالىق قولداۋ كورسەتۋ;
- الەۋمەتتەندىرۋ جانە جەكە دامۋ پروتسەسىن ساپالى ۇيىمداستىرۋ جانە باسقارۋ;
- بەلسەندى ءبىلىم بەرۋدىڭ جەكە ماڭىزدىلىعىن، تانىمدىق قىزمەت ادىستەرىن دامىتۋ مەن زەردەلەۋگە باسا نازار اۋدارۋ;
- ءوزىن-ءوزى جۇزەگە اسىرۋ مۇمكىندىگىن قامتاماسىز ەتۋ، جەكە ستۋدەنتتىڭ بۇكىل ءبىلىم بەرۋ پروتسەسىن باعدارلاۋ;
- وزدىگىنەن ءبىلىم الۋعا جانە ستۋدەنتتەردىڭ كاسىبي باعدارلاۋىنا قولايلى جاعدايلار جاساۋعا ءار ءتۇرلى پەداگوگيكالىق تەحنولوگيالاردى پايدالانۋ.
- ءوزىن-ءوزى تانۋدا ەڭ وزىق ءبىلىم مەن پەداگوگيكالىق ەلەمەنتتەردى قوسا العاندا، زەرتتەۋ سالاسىنداعى ءبىلىمى مەن تۇسىنىگىن كورسەتۋ;
- الەۋمەتتىك، ەتيكالىق جانە عىلىمي پايىمداۋلاردى ەسكەرە وتىرىپ، پايىمداۋلار جاساۋعا قاجەت اقپاراتتاردى جيناۋ جانە ينتەرپرەتاتسيالاۋ.
ءبىز ءۇمىت ارتار بولاشاق تەك فيزيكالىق تۇرعىدان دەنى ساۋ ۇرپاق عانا ەمەس، پسيحولوگيالىق، رۋحاني كەمەلدەنگەن، تاربيەسى ۇلتىنىڭ تاريحىنان باستاۋ العان پاتريوت، مەنتالدى ساۋ بولۋ ءتيىس. وسى نەگىزدە قوعامعا قاجەتتى، جوعارعى ءبىلىمدى، بىلىكتى الەۋمەتتىك پەداگوگ ماماندارىن دايالاۋدا پەداگوگيكا جانە ءبىلىم بەرۋ مەنەدجمەنتى كافەدراسىنىڭ ۇستازدارى ايانباي ەڭبەك ەتۋدە. مەن كازۇۋ ۇستازدارىنىڭ شاكىرتى بولعانىما ماقتانامىن.
مەملەكەتىمىزدىڭ بولاشاعى ۇرپاققا دەگەن ساباقتاستىقتان تۋىندايتىن بولعاندىقتان، ەل ءبىلىمدى جاستارعا تاۋەلدى. ءبىلىمدى ۇرپاق-ىرگەلى ەلدىڭ كەپىلى ەكەنى داۋسىز، ەندەشە الەمنىڭ دامىعان مەملەكەتتەرىمەن يىق تەڭەستىرەر دەڭگەيدە، باسەكەگە قابىلەتتى بولايىق دەگىم كەلەدى.
ءال-فارابي اتىنداعى قازاق ۇلتتىق ۋنيۆەرسيتەتىنىڭ
پەد.ع.ك.، دوتسەنت تەكەسباەۆا انار مولداقىنوۆنا
«الەۋمەتتىك پەداگوگيكا جانە ءوزىن-ءوزى تانۋ» ماماندىعىنىڭ
1 كۋرس ماگيسترانتى ەديلباەۆا اراي ۋميرباەۆنا
