ماڭعىستاۋ وبلىسىنىڭ مۇنايشىلارى مەن تەمىرجولشىلارى ءوز قۇقىقتارىن تالاپ ەتتى، «WestOilSoftware» جشس جۇمىسشىلارىنىڭ جاپپاي نارازىلىق اكتسياسى بولعان جەردە قۇقىق قورعاۋ ورگاندارىنىڭ ارنايى بولىمشەلەرىنىڭ قىزمەتكەرلەرىنە ءتان كيىم كيگەن ادامدار كورىندى، دەپ حابارلايدى «ادىرنا» ۇلتتىق پورتالى.
«ءبىز، ماڭعىستاۋ وبلىسىنداعى «WestOil» جۇمىسشىلارى بۇعان دەيىن زاڭ اياسىندا ءوز تالاپتارىمىزدى قويعانبىز، ول ورىندالماي قالدى. وسى تالاپتاردى ورىنداماعاندىقتان، ءبىز كونستيتۋتسيالىق قۇقىعىمىزدى پايدالانا وتىرىپ، توتەنشە شارالار قولداندىق، اتاپ ايتقاندا، بۇگىن، 11 جەلتوقساندا كوشەگە شىقتىق»، - دەدى مۇنايشىلار وكىلى سەنبى كۇنى عالامتوردا تاراعان ۆيدەودا.
مۇنايشىلاردىڭ جاپپاي نارازىلىعى بولعان جەردە قاۋىپسىزدىك كۇشتەرى وكىلدەرىنىڭ كيىمىن كيگەن ادامدار بەينەلەنگەن ۆيدەو دا تارالۋدا. تاراتىلىپ جاتقان ۆيدەونىڭ سيپاتتاماسىندا بۇل ادامدار «ارنايى جاساق» دەپ كورسەتىلەدى.
ماڭعىستاۋ وبلىسى بويىنشا مەملەكەتتىك ەڭبەك ينسپەكتسياسى WestOilSoftware كومپانياسى قىزمەتكەرلەرىنىڭ ءۇش تالابىنىڭ ەكەۋى «ەڭبەك اربيتراجىنىڭ وتىرىسىندا ەسكەرتىلگەن» ەڭبەك داۋىنا نەگىز بولىپ تابىلمايدى دەپ وتىر.
«قىزمەتكەرلەردىڭ ءبىر تالابى قاناعاتتاندىرىلدى، سوندىقتان قىزمەتكەرلەردىڭ ەرەۋىل وتكىزۋ تۋرالى شەشىم قابىلداۋى ەڭبەك زاڭناماسىنا سايكەس نەگىزسىز بولىپ تابىلادى. ۆەدومستۆو باسشىسى اتالعان كومپانيا قىزمەتكەرلەرىنىڭ تالاپتارىنا قاتىستى ەڭبەك زاڭناماسىنىڭ نورمالارىن ءتۇسىندىردى. بۇل تالاپتار بىتىمگەرشىلىك كوميسسياسىندا جانە داۋدى رەتتەۋ جانە پروبلەمالىق ماسەلەلەردى شەشۋ مۇمكىندىگىن قاراستىرۋ ماقساتىندا قۇرىلعان ەڭبەك تورەلىگىنىڭ وتىرىسىندا قارالدى. وسىلايشا، ءۇش تالاپتىڭ ءبىرى – اۆتوكولىكتى، ارنايى تەحنيكانى جاڭعىرتۋ، بۇل ماسەلە «قازمۇنايگاز» جانە «ويل ترانسپورت كورپورەيشەن» كومپانيالارىنىڭ وكىلدەرىمەن بىرنەشە رەت تالقىلاندى. ەڭبەك تورەلىگىنىڭ وتىرىسىندا كوپشىلىك داۋىسپەن 16 قاراشادا «قازمۇنايگاز» كومپانياسى ۇسىنعان باعدارلاما بويىنشا كولىك تەحنيكاسىن جاڭارتۋ تۋرالى تالاپتى قاناعاتتاندىرۋ تۋرالى حاتتامالىق شەشىم قابىلدادى»، - دەپ ءتۇسىندىردى شەنەۋنىكتەر.
سونىمەن بىرگە ولار «مۇناي كولىك كورپوراتسياسى» كومپانياسىنىڭ قىزمەتكەرلەرىنە اۋىسۋ جانە «WestOilSoftware» جشس قىزمەتكەرلەرىنە قمگ ۇلتتىق كومپانياسىنىڭ بىرىڭعاي ەڭبەكاقى جۇيەسىن ەنگىزۋ تۋرالى تالاپتار قاراستىرىلمادى، ويتكەنى بۇل ماسەلەلەر ەڭبەك داۋلارىنىڭ نىساناسى بولىپ تابىلمايدى جانە ولاردى شەشۋ جۇمىس بەرۋشى WestOilSoftware جشس قۇزىرەتىنە جاتپايتىنىن جەتكىزدى.
«بۇل ەكى تالاپ ەڭبەك زاڭناماسىنا سايكەس ەڭبەك داۋى بولىپ تابىلمايدى. وسى ماسەلە بويىنشا ەڭبەك مينيسترلىگىنىڭ تولىق تۇسىندىرمە حاتى بار. بۇدان باسقا، مەملەكەتتىك ورگاندار تاراپىنان «WestOilSoftware» جشس قىزمەتكەرلەرىمەن جانە «قازمۇنايگاز»وكىلدەرىمەن بىرنەشە رەت ءتۇسىندىرۋ جۇمىستارى جۇرگىزىلدى. قازىرگى ۋاقىتتا ۇجىمدىق داۋ شەشىلدى دەپ سانالادى، ويتكەنى ءبىر تالاپ ورىندالدى، ال قالعان ەكەۋى ەڭبەك داۋىنا جاتپايدى. وسىعان بايلانىستى قىزمەتكەرلەردىڭ ەرەۋىل وتكىزۋ تۋرالى شەشىم قابىلداۋى ەڭبەك زاڭناماسىنا سايكەس نەگىزسىز بولىپ تابىلادى»، - دەدى ەڭبەك ينسپەكتسياسى.
سونداي-اق لاۋازىمدى تۇلعالاردىڭ ايتۋىنشا، ەڭبەك كودەكسىنىڭ 176-بابىنىڭ 1-تارماعىنىڭ 2-1 تارماقشاسىنا سايكەس، قاۋىپتى وندىرىستىك وبەكتىلەردە نەگىزگى جابدىقتار مەن مەحانيزمدەردىڭ ۇزدىكسىز جۇمىس ىستەۋى قامتاماسىز ەتىلمەسە، اۋىر جانە قاۋىپتى زارداپتارعا بايلانىستى قىزمەت توقتاتىلادى.
«اتالعان كاسىپورىندارداعى ەرەۋىلدەرگە ەڭبەك زاڭناماسىمەن تىيىم سالىنادى، سەبەبى ولار «ممگ» اق قاۋىپتى وندىرىستىك وبەكتىلەرىنىڭ قىزمەتىن قامتاماسىز ەتەدى (ۇزدىكسىز تسيكلدى كاسىپورىن بولىپ تابىلادى), ونىڭ قىزمەتىن توقتاتا تۇرۋ وندىرىستىك پروتسەسس ءۇشىن قايتىمسىز سالدارعا اكەپ سوعۋى مۇمكىن. جۇمىس بەرۋشى ەرەۋىلدى زاڭسىز دەپ تانۋ ءۇشىن سوتقا جۇگىنۋگە قۇقىلى، سايكەسىنشە سوت زاڭدى باعاسىن بەرەدى. ەگەر ەرەۋىل زاڭسىز دەپ تانىلسا، قاتىسۋشىلارعا قولدانىستاعى زاڭنامادا كوزدەلگەن جاۋاپكەرشىلىك شارالارى قولدانىلۋى مۇمكىن»، - دەدى مەملەكەتتىك ەڭبەك ينسپەكتسياسى.
بۇدان باسقا، ماڭعىستاۋ وبلىسىنىڭ تەمىرجولشىلارى دا ەڭبەك جاعدايلارىن جاقسارتۋ جانە باسشىلىقتىڭ ورنىنان ءتۇسۋ تالاپتارىن قويعانى بەلگىلى بولدى.
«ءبىز بەينەۋ تەمىرجولشىلارىنىڭ تالاپتارىن قولدايمىز»، - دەدى جاڭاوزەن تەمىرجولشىلارى ۆيدەودا.
بۇعان دەيىن بەينەۋدەگى «قازاقستان تەمىر جولى «ۇلتتىق كومپانياسى» اق (قتج) قىزمەتكەرلەرى باسشى تاراپىنان قۋعىن-سۇرگىنگە شاعىمدانىپ، ونىڭ جۇمىستان شىعارۋدى تالاپ ەتكەن بولاتىن.
ماڭعىستاۋ وبلىسى اكىمىنىڭ ءباسپاسوز قىزمەتى بۇل جاعدايعا كەيىنىرەك تۇسىنىكتەمە بەرۋگە ۋادە بەردى.
«ادىرنا» ۇلتتىق پورتالى
