كەشە، 2023 جىلدىڭ 11 جەلتوقسانىندا قازاقستان رەسپۋبليكاسى پارلامەنتى ماجىلىسىندە «ەسىرتكى قىلمىسىنا قارسى ءىس-قيمىل جونىندەگى شارالار تۋرالى» تاقىرىبىنداعى ۇكىمەت ساعاتى ءوتتى.قر پارلامەنتى ءماجىلىسى دەپۋتاتى، «اق جول» فراكتسياسى مۇشەسى قازىبەك يسا ۇكىمەت ساعاتىندا بايانداما جاساعان قر ىشكى ىستەر ءمينيسترى ەرجان سادەنوۆكە وتكىر سۇراق قويدى.
قۇرمەتتى ىشكى ىستەر ءمينيسترى ەرجان ساپاربەكۇلى!
ەل ىشىندەگى وباداي قاۋىپتى، ەستىنى ەسىنەن ايىراتىن ەسىرتكىمەن كۇرەسۋ ەڭ الدىمەن مەملەكەتتىڭ، قوعامنىڭ مىندەتى.
بۇل كۇرەستە قۇقىق قورعاۋ قىزمەتكەرلەرىنىڭ ۇلەسى كوپ.
بۇنى قازىر ءسىزدىڭ بايانداماڭىزدان بايقادىق.
بىراق قۇقىق قورعاۋ قىزمەتكەرلەرىنىڭ وزدەرى ەسىرتكى ساتۋ، وتكىزۋ ۇستىندە ۇستالىپ جاتقانى تۋرالى باق-تاعى دەرەكتەر اقىلعا سيا ما؟
مىسالى، بيىل ەلىمىزدىڭ 8 وڭىرىندە 11 پوليتسيا قىزمەتكەرى، ءتىپتى باسشىسىمەن بىرگە، ەسىرتكى وتكىزىپ جاتقاندا ۇستالدى.
بۇل استانا، تاراز، قوستاناي، الماتى، اقتاۋ قالالارىندا، شقو، بقو، الماتى وبلىسىندا بولعان جاعداي.
بۇل پوليتسيا قىزمەتكەرلەرى تاركىلەنگەن ەسىرتكىنى قايتا اينالىمعا ساتتى دەپ ايىپتالدى.
بۇل نە ماسقارا! قازاق «ەت ساسىسا، تۇز سەبەدى، تۇز ساسىسا نە سەبەدى» دەيدى!
تاركىلەنگەن ەسىرتكى كۇشەيتىلگەن رەجيمدە قورعالىپ، ەرەكشە تارتىپپەن جويىلۋى ءتيىس ەمەس پە!
سوندا ءبىز قاسقىرعا قوي باقتىرعانداي، ەسىرتكىمەن كۇرەستى كىمدەرگە سەنىپ تاپسىرعانبىز؟
بيىل كۇزەتشى يتتەر 260 ەسىرتكى قىلمىسىن اشىپ، 6 توننادان استام ەسىرتكى تاركىلەنگەن. سوندا يتتەر ەسىرتكى تابادى، ۇستايدى، ال پوليتسيا ونى ساتادى؟!
سوندا پوليتسيا مەن ءيتتىڭ قايسىسى سەنىمدى بولىپ تۇر؟!
ياعني، تاركىلەنگەن ەسىرتكىنى جويۋدى قاتاڭ كۇشەيتۋ كەرەك، پوليتسيانىڭ وزىنە باقىلاۋ قاجەت!
سىزگە قويار ساۋالىم:
- مەملەكەت، قوعام بولىپ بۇل اسا قاۋىپتى دەرتپەن كۇرەسىپ جاتقاندا، پوليتسيانىڭ مۇنداي قىلمىسى جايلى نە دەيسىز؟!
- قۇقىق قورعاۋ ورگانى قىزمەتكەرلەرى جاساعان قىلمىستار بويىنشا رەسمي ستاتيستيكا بار ما؟
ونىمەن كۇرەسۋدە نە ىستەپ جاتسىزدار؟ - بۇدان كەيىن ءوزى قىلمىس جاسايتىن پوليتسياعا ەل قالاي سەنەدى مينيستر مىرزا؟!.
ەسىرتكى ساتقان پوليتسياعا ەستى ادام سەنە مە؟
راقمەت.
ىشكى ىستەر ءمينيسترىنىڭ جاۋابىن بەينەجازبادان كورە الاسىزدار.
«ادىرنا» ۇلتتىق پورتالى
