ىشكى ىستەر مينيسترلىگىنىڭ اكىمشىلىك پوليتسيا كوميتەتى رەسەيلىك سەنساتسيالىق «سلوۆو پاتسانا. كروۆ نا اسفالتە» سەريالىن تەكسەرۋدى سۇراعانىن حابارلادى، - دەپ حابارلايدى "ادىرنا" پورتالى.
ورتالىق كوممۋنيكاتسيالار قىزمەتىندە وتكەن بريفينگتە جۋرناليستەر ىشكى ىستەر مينيسترلىگى كوميتەتى رەسەيلىك سەريالداردى قازاقستاندىق جاستارعا زيان دەپ ساناي ما جانە وعان ەلىمىزدە تىيىم سالۋعا بولا ما دەگەن ساۋال قويدى.
كوميتەت وكىلدەرىنىڭ ايتۋىنشا، ولار مادەنيەت جانە اقپارات مينيسترلىگىنە سەريالدىڭ زاڭسىزدىعىنا تالداۋ جاساۋدى سۇراپ حات جولداعان. ۆەدومستۆو وسىلاي دەپ ەسەپتەسە، قازاقستاندا «جىگىتشە ءسوز. اسفالتتاعى قان» تۋىندىسىنا تىيىم سالىنۋى مۇمكىن.
«بىزدە مادەنيەت جانە اقپارات مينيسترلىگى بار، ولار ونلاين-پلاتفورمالارعا مونيتورينگ جۇرگىزەتىن ۋاكىلەتتى ورگان. ال زاڭعا سايكەس، زاڭسىز كونتەنت دەگەنىمىز - كونستيتۋتسيالىق قۇرىلىستى كۇشپەن وزگەرتۋگە شاقىرۋ، ەلدىڭ قاۋىپسىزدىگىنە نۇقسان كەلتىرەتىن ۇگىت-ناسيحات، سوعىستى ناسيحاتتاۋ، الەۋمەتتىك، ناسىلدىك، ۇلتتىق، ءدىني، تاپتىق، رۋلىق باسىمدىقتى، قاتىگەزدىك پەن زورلىق-زومبىلىق مادەنيەتىن، سۋيتسيد پەن پورنوگرافيانى، ەسىرتكىنى جانە ت.ب. بولىپ تابىلادى. مادەنيەت مينيسترلىگى بۇل سەريالدىڭ زاڭسىزدىعىن ساراپتايدى. ەگەر ولار ونى زاڭسىز مازمۇن دەپ تاپسا، ءتيىستى شارا قولدانادى»، - دەدى ءىىم اكىمشىلىك پوليتسيا كوميتەتى توراعاسىنىڭ ورىنباسارى رەنات زۇلحايىروۆ.
ىشكى ىستەر مينيسترلىگى اكىمشىلىك پوليتسيا كوميتەتىنىڭ توراعاسى قايسار سۇلتانباەۆ زاماناۋي تاقىرىپتا جاستارعا قىزىقتى سەريالدار تۇسىرەتىن بولساق، تەك زورلىق-زومبىلىقسىز، كىسى ءولتىرۋسىز، قورلاۋسىز، ءسۋيتسيدسىز كونتەنت بولۋى كەرەك ەكەنىن جەتكىزدى.
«قىسقاسى، جاستاردى ءسال باسقاشا تاربيەلەۋ ءۇشىن كەيبىر فيلمدەردى زورلىق-زومبىلىقسىز ءتۇسىرۋ كەرەك. وسىعان وراي، تەرىس ماعىناداعى تەلەسەريالداردا ءمينيستردىڭ، بارلىق اۋماقتىق دەپارتامەنتتەردىڭ تاپسىرماسى بويىنشا، ءبىلىم مينيسترلىگىمەن بىرلەسە وتىرىپ، وقۋشىلار مەن ستۋدەنتتەر اراسىندا قىلمىستىق يدەولوگيا تەك نە ولىمگە، نە تۇرمەگە اپارادى دەگەن تاقىرىپتا ءتيىستى دارىستەر وتكىزبەسەك، ءتۇبى جاقسىدىققا اپارمايدى، - دەدى قايسار سۇلتانباەۆ.
بۇعان دەيىن عىلىم جانە جوعارى ءبىلىم ءمينيسترى ساياسات نۇربەك پەن ءبىلىم ءمينيسترى عاني بەيسەمباەۆ رەسەيلىك «جىگىتشە ءسوز. اسفالتتاعى قان» سەنساتسيالىق سەريالىنا قازاقستاندا تىيىم سالۋ كەرەك پە دەگەن سۇراققا جاۋاپ بەرگەن بولاتىن.
