قازاقستان پرەزيدەنت قاسىم-جومارت توقاەۆ قىرعىزستان پرەزيدەنتى سادىر جاپاروۆتى ەكى ەل اراسىنداعى وداقتاستىق قاتىناستار تۋرالى شارتقا قول قويىلعانىنا 20 جىل تولۋىمەن قۇتتىقتادى. بۇل تۋرالى اقوردا جاريالادى، دەپ حابارلايدى “ادىرنا” ۇلتتىق پورتالى.
«2003 جىلعى شارت قازاق-قىرعىز قاتىناستارىنىڭ دامۋىندا جاڭا كەزەڭنىڭ باستالعانىن بىلدىرەدى. ءبىزدىڭ كوپجاقتى مەملەكەتارالىق بايلانىستارىمىزدى ءتيىمدى ىلگەرىلەتۋ ءۇشىن بەرىك شارتتىق-قۇقىقتىق نەگىز قالاندى. بارلىق دەڭگەيدەگى بەلسەندى ساياسي ديالوگ، ساۋدا-ەكونوميكالىق جانە مادەني-گۋمانيتارلىق سالالارداعى ىنتىماقتاستىقتىڭ قارقىندى دامۋى، سونداي-اق ەكى ەلدىڭ حالىقارالىق ارەناداعى تىعىز ىقپالداستىعى – سونىڭ ايقىن دالەلى»، – دەپ جازىلعان جەدەلحاتتا.
قاسىم-جومارت توقاەۆ بىرلەسكەن كۇش-جىگەردىڭ ارقاسىندا قازاقستان مەن قىرعىزستان اراسىنداعى ستراتەگيالىق سەرىكتەستىك پەن وداقتاستىق قاتىناستار ودان ءارى نىعايىپ، ەكىجاقتى ىقپالداستىقتىڭ وراسان زور الەۋەتى باۋىرلاس حالىقتاردىڭ يگىلىگى ءۇشىن قىزمەت ەتە بەرەتىنىنە سەنىم ءبىلدىردى.
