تۇركىمەنستان پرەزيدەنتى سەردار بەردىمۇحامەدوۆ ءوزىنىڭ العاشقى كىتابىن شىعاردى. بۇل تۋرالى ول 25 جەلتوقساندا ءوڭىر باسشىلارى مەن پرەمەر-ءمينيستردىڭ اگروونەركاسىپتىك كەشەن جونىندەگى ورىنباسارىنىڭ قاتىسۋىمەن وتكەن جۇمىس كەڭەسىندە ءمالىم ەتتى، دەپ حابارلايدى «ادىرنا» ۇلتتىق پورتالى Orient.tm سايتىنا سىلتەمە جاساي وتىرىپ.
كىتاپ «Ýaşlar – Watanyň daýanjy» («جاستار – ەل تىرەگى») دەپ اتالادى، وندا تۇركىمەن جاستارىنىڭ جەڭىستەرى مەن جەتىستىكتەرى باياندالادى.
باسىلىمنىڭ شىعۋى 27 جەلتوقساندا وتەتىن «ارقاداعى سەردارمەن باقىتتى جاستار» جىل قورىتىندىسىنا ارنالعان حالىقارالىق عىلىمي-تاجىريبەلىك كونفەرەنتسيا مەن كورمەگە ورايلاستىرىلعان.
سەردار بەردىمۇحامەدوۆ كىتاپتىڭ العاشقى داناسىن اكەسى، تۇركىمەنستاننىڭ «حالق ماسلاحاتى» (حالىق كەڭەسى) توراعاسى، بۇرىنعى پرەزيدەنتى گۋربانگۋلى بەردىمۇحامەدوۆكە جولدادى.
«مەن بۇل كىتاپتىڭ العاشقى داناسىن تۇرىكمەن حالقىنىڭ ۇلتتىق كوشباسشىسى باتىر اركاداگقا سىيلىق رەتىندە جىبەرىپ وتىرمىن»، - دەپ كەلتىرەدى تۇركمەنپورتال پرەزيدەنتتىڭ ءسوزىن.
ەسكە سالايىق، گۋربانگۋلى بەردىمۇحامەدوۆ 16 جىل ىشىندە ءوز اتىمەن ءتۇرلى تاقىرىپتا 60-قا جۋىق كىتاپ شىعارعان. ونىڭ ىشىندە مەديتسينا، فيلوسوفيا، مادەنيەت، رۋحانيات، الاباي يتتەرى، احالتەكە جىلقىلارى، سپورت تاقىرىپتارىنا ارنالعان ەڭبەكتەر جانە ارقاداعى اتا-بابالارىنا ارنالعان بىرقاتار روماندار (مەتسەنات; بەردىمۇحامەدوۆ وسى اتاۋدى رەسمي تۇردە الادى) بار.
«ادىرنا» ۇلتتىق پورتالى
